Алматы қаласы мен Алматы облысында электр қуатының жаппай өшуіне Орталық Азияның энергетикалық жүйесіндегі электр энергиясы ауысымының күрт өзгеруі себеп болған, деп хабарлайды «Dalamedia» ақпараттық порталы.

Қазақстан Энергетика министрлігінің мәліметінше, 14 тамызда энергетикалық жүйеде қуаттың күрт артуы тіркелген. Соның салдарынан апатқа қарсы автоматика іске қосылып, Алматы мен Алматы облысындағы бірқатар тұтынушы электр желісінен ажыратылған.

Қазір жүйелік оператор «KEGOC» АҚ электрмен жабдықтауды қалпына келтіру жұмыстарын жүргізіп жатыр. Кейбір аумақта жарық қайта жанған. Жағдай Энергетика министрлігінің бақылауында.

«KEGOC» компаниясы оқиғаға қатысты түсініктеме берді. Компанияның хабарлауынша, 14 тамыз күні сағат 14:37-де Қазақстанның Бірыңғай электр энергетикалық жүйесінде технологиялық бұзушылық тіркелген.

Осының салдарынан Қазақстан БЭЖ-нің Оңтүстік аймағы мен Орталық Азияның Біріккен энергетикалық жүйесі оқшауланған жұмыс режиміне көшкен. Апаттан кейін Қазақстанда тұтынушыларды электрмен жабдықтауды шектеу көлемі шамамен 2810 МВт болған.

Қалпына келтіру жұмыстары бірден басталған. Сағат 14:47-де Қарағанды, Абай және Ұлытау облыстарындағы 295 МВт көлеміндегі шектеулер алынған.

Қазіргі уақытта «KEGOC» АҚ электр қуатын толық қалпына келтіру жұмыстарын жалғастырып жатыр.

Айта кетейік, жарықтың жаппай өшуі Алматы қаласының барлық ауданында және Алматы облысының он ауданында тіркелді. Электр қуатының үзілуі Тәжікстанның бірнеше қаласы мен ауданында, сондай-ақ Қырғызстанның Бішкек қаласында да болған.