Алматыда тұрмыстық қалдықтарды қайта өңдеп, оны электр энергиясына айналдыратын жаңа зауыттың құрылысы басталады. Жобаны Қытайдың Hunan Junxin Environmental Protection Co., Ltd компаниясы жүзеге асырады. Инвестиция көлемі 145,5 миллиард теңгені құрайды, — деп хабарлайды «Dalamedia» ақпараттық порталы.

Компания директорлар кеңесінің төрағасы Дай Даого Премьер-министр Олжас Бектеновке жобаның құрылысы 29 мамырда басталатынын жеткізген.

Жоба аясында зауыт екі жыл ішінде толық іске қосылады деп жоспарланып отыр. Кәсіпорын тұрмыстық қатты қалдықтарды өңдеудің заманауи жүйесіне негізделіп, қоқысты электр энергиясына айналдырады.

Толық қуатында жұмыс істеген кезде зауыт жылына шамамен 200 мың тонна көмірқышқыл газының шығарындыларын азайтуға мүмкіндік береді. Сонымен қатар, полигондарға түсетін жүктеме 800 мың текше метрге дейін қысқарады деп күтілуде.

Кәсіпорын тәулігіне 2 мың тоннаға дейін қалдық өңдеп, 60 МВт электр энергиясын өндіре алады. Құрылыс кезеңінде кемінде 700 уақытша жұмыс орны ашылады, ал зауыт іске қосылғаннан кейін 120 тұрақты жұмыс орны қарастырылған.

Үкіметтің мәліметінше, жоба аясында үш “жасыл” орталық құрылады. Олар сенімді электрмен жабдықтауды қамтамасыз етуге, цифрлық шешімдерде энергияны тиімді пайдалануға және қыс мезгілінде өнеркәсіп пен қала қажеттіліктері үшін таза жылу өндіруге бағытталады.

Сонымен қатар технология трансфері, қосалқы бөлшектер өндірісін жергіліктендіру, жергілікті мамандарды даярлау және экологиялық мәдениетті арттыруға арналған үш база қалыптастыру жоспарланған.

Премьер-министр Олжас Бектенов тиісті мемлекеттік органдарға жобаны уақытылы әрі сапалы жүзеге асыру үшін қажетті қолдау көрсетуді тапсырған.