Жетісу облысында ҰБТ-дан жоғары балл жинаған түлектердің ата-аналары мемлекеттік грантқа іліге алмағандарына алаңдап, Ғылым және жоғары білім министрлігінен көмек сұрады. Олардың арасында 120-125 балл жинаған және «Алтын белгі» иегерлері де бар, — деп хабарлайды «Dalamedia» ақпараттық порталы 31-арнаның «Информбюро» жаңалықтар бағдарламасына сілтеме жасап.

Жетісулық талапкер Жансая Шаму мектепті «Алтын белгімен» тәмамдап, ҰБТ-дан 120 балл жинаған. Шет тілі бағытын таңдаған түлек бес жоғары оқу орнына өтініш бергенімен, грантқа өте алмаған. Анасы мұндай нәтижемен ақылы оқуға мәжбүр болу әділетсіз екенін айтады.

Облыста Жансаядан бөлек, жоғары балл жинап, грантқа іліге алмаған оннан астам талапкер бар. Ата-аналар арасында 125 балл жинаған түлектер де бар екенін айтып, университеттердегі іріктеу талаптарының түсініксіз екенін жеткізді.

Министрлік өкілдерінің айтуынша, мұндай жағдай көбіне шет тілі мен медицина бағыттарында кездеседі. Бұл мамандықтарға грант саны шектеулі болғандықтан, жоғары балл жинаған талапкердің өзі грантсыз қалуы мүмкін. Ал грантқа түсе алмағандар қазақстандық жоғары оқу орындары ұсынатын екі мыңнан астам жеке грантқа өтініш бере алады.