Президент Қасым-Жомарт Тоқаев Ақордада ұлт мүддесіне қызмет етіп, елдің қоғамдық, мәдени және ғылыми дамуына үлес қосқан бір топ азаматқа мемлекеттік наградалар мен құрметті атақтар табыстады, — деп хабарлайды «Dalamedia» ақпараттық порталы.

Марапатталғандардың қатарында көрнекті суретші, өнер қайраткері Бәтима Зәуірбекова, әдебиеттанушы ғалым Тұрсын Жұртбай және мемлекет қайраткері Александр Судьин бар.

Бәтима Зәуірбековаға «Отан» ордені берілді. Президент оның қазақ әйелдері арасынан гобелен өнері бойынша шыққан алғашқы кәсіби маман екенін атап өтті. Мемлекет басшысы суретшінің ұлттық тарихты, халықтың болмысын, ою-өрнегі мен салт-дәстүрін шығармалары арқылы дәріптегеніне тоқталды.

Тоқаев Бәтима Зәуірбекованың еңбегі жоғары бағаланып, Мемлекеттік сыйлыққа ие болғанын да айтты. Оның туындылары Алматы және басқа қалалардағы белгілі ғимараттарды безендіріп тұр. Суретшінің еңбектері шетелдерде де сақталған.

Ал көрнекті ғалым әрі қаламгер Тұрсын Жұртбай I дәрежелі «Барыс» орденімен марапатталды. Президент ғалымның ұлттық тарихтың зерттелмей қалған тұстарын зерделеп, халықтың тарихи санасын жаңғыртуға елеулі үлес қосқанын атап өтті.

Мемлекет басшысы оның Абай шығармашылығын зерттеген еңбектеріне де тоқталды. Сонымен қатар Тұрсын Жұртбайдың Мұхтар Әуезов пен өзге де ұлт қайраткерлерінің мұрасы мен өнегелі өмірі туралы ғылыми еңбектер жазғанын айтты.

Мемлекет қайраткері Александр Судьинге II дәрежелі «Барыс» ордені табысталды.

Бұдан бөлек, белгілі актер әрі театр режиссері Нұрқанат Жақыпбайға «Қазақстанның халық әртісі» атағы берілді. Ал ауыл шаруашылығы саласының ардагері Виктор Хильниченко «Қазақстанның еңбек сіңірген қайраткері» құрметті атағына ие болды.