Тамыз айында қазақстандықтар түнгі аспандағы ең әдемі құбылыстардың бірі – Персеидтер метеор ағынын тамашалай алады. Ғалымдардың айтуынша, биыл бұл құбылысты бақылауға қолайлы жағдай қалыптасып отыр, - деп хабарлайды «Dalamedia» ақпараттық порталы.

Персеидтердің ең жоғары белсенділігі 12 тамыздан 13 тамызға қараған түні байқалады. В. Г. Фесенков атындағы Астрофизика институты директорының орынбасары Рашит Валиуллиннің айтуынша, метеор ағынын жергілікті уақытпен түн ортасынан кейін, әсіресе 03:00-ден 05:00-ге дейінгі аралықта бақылаған тиімді. Осы уақытта Персей шоқжұлдызы солтүстік-шығыс көкжиектен жоғары көтеріледі.

Биыл Айдың жарығы да кедергі келтірмейді. Персеидтердің шарықтау кезеңі жаңа айға сәйкес келетіндіктен, аспан барынша қараңғы болады.

Метеорларды көру үшін телескоп немесе арнайы құрал қажет емес. Қала шамдарынан алыс, аспаны ашық жерге барып, көзді қараңғылыққа үйретсе жеткілікті. Мамандар метеорлар ұшып шығатын радианттың дәл өзіне қарамай, одан 40–60 градус шеткері бақылауға кеңес береді. Бұл аймақта ұзын әрі жарық іздерді көру мүмкіндігі жоғары.

Қала сыртында ауа райы қолайлы болса, бір сағаттың ішінде 80–100-ге жуық метеорды байқауға болады.

Персеидтер Жердің 109P/Свифт–Туттль кометасы қалдырған шаң-тозаң мен бөлшектердің арасынан өтуі кезінде пайда болады. Құм түйіріндей ұсақ бөлшектер атмосфераға секундына шамамен 59 шақырым жылдамдықпен еніп, жанып кетеді. Соның нәтижесінде аспанда жарқыраған іздер пайда болады.

Ал тамыздағы Персеидтерді тамашалай алмай қалғандар үшін күзде тағы бір мүмкіндік бар. 21–22 қазанда Қазақстан аумағынан Орионидтер метеор ағынын бақылауға болады.