Марқұм фельдшер Ұлдана Мырзуанның жұбайы Әділет Зейнел оның мұрасына қатысты мәселе мен әкімдік арқылы жиналған 20 миллион теңгенің жұмсалуына байланысты түсініктеме берді, — деп хабарлайды «Dalamedia» ақпараттық порталы.

Әділет Зейнел «Қазақстан халық партиясының» YouTube арнасына берген сұхбатында Ұлдананың көлігі мен зейнетақы қорындағы қаражатқа қатысты жағдайды айтып берді. Оның сөзінше, бастапқыда көлік өзіне қалдырылуы керек болған. Алайда кейін Ұлдананың ата-анасы көлікті өздеріне рәсімдеуді сұраған.

Әділеттің айтуынша, көлік 2025 жылдың шілдесінде несиеге алынған. Ұлдананың қазасына дейін небәрі үш ай төлем жасалған. Кейін көлікке шамамен 10 миллион теңге төленіп, банк кепілінен шығарылған. Қазір көлік Ұлдананың ата-анасының қолында.

Ал Ұлдананың анасы Эльза Ерманованың айтуынша, көлік ата-анасына берілгеннен кейін марқұмның зейнетақы қорында жиналған 2,3 миллион теңге Әділетке тапсырылған. Нотариус мұраның әкесі, анасы және жұбайы арасында үшке бөлінетінін түсіндірген. Кейін екі тарап өздеріне тиесілі мұраның бір бөлігінен бас тартуға келіскен.

Сонымен қатар отбасы әкімдік арқылы жиналған 20 миллион теңгенің қалай жұмсалғанын да түсіндірді. Эльза Ерманованың айтуынша, оның 3,9 миллион теңгесі Ұлдананың анасына, 1,1 миллион теңгесі әпкесіне аударылған. Кейін әпкесіне тағы 1,34 миллион теңге берілген.

Қалған қаражат Ұлдананың қырқына дейін әр бейсенбі сайын берілген асқа жұмсалған. Эльза Ерманова бұл ақшаның отбасының жеке қажетіне жұмсалмағанын, негізінен көлікке және Ұлдананың ұзатуына алынған несиеге төлем жасалғанын айтты. Ал Kaspi Bank-тегі Ұлдананың қарызы банк тарапынан жабылған.

Әділет Зейнел бұған дейін әкімдіктен пәтер талап етті деген ақпаратты да жоққа шығарды. Оның сөзінше, қазір өзі еңбек етіп сатып алған пәтерде анасымен және бауырымен бірге тұрып жатыр.

Ол Ұлдананың жұмыс кезінде жарақат алып, кейін медальмен марапатталғанын айтып, марқұмның отбасына өтемақы талап етпейтінін жеткізді. Әділет Ұлдананың өзі үшін әрдайым қаһарман болып қалатынын атап өтті.