Қазақстан Президенті Қасым-Жомарт Тоқаев Армения премьер-министрі Никол Пашинянмен телефон арқылы сөйлесті. Мемлекет басшысы оны Үкімет басшысы қызметіне қайта тағайындалуымен құттықтап, армян халқының игілігі жолындағы жұмысына табыс тіледі, — деп хабарлайды «Dalamedia» ақпараттық порталы.

Никол Пашинян көрсетілген жылы лебіз үшін алғысын білдіріп, Қазақстан Президенті мен халқына Құрылтай сайлауын сәтті өткізуге тілектестігін жеткізді.

Ақорда мәліметінше, тараптар Қазақстан мен Армения арасындағы қарым-қатынастың қарқынды дамып келе жатқанын атап өтіп, екі ел арасындағы жан-жақты ынтымақтастықты одан әрі нығайтуға дайын екендерін білдірді.

Әңгіме барысында 2025 жылдың қараша айында Никол Пашинянның Астанаға жасаған ресми сапары кезінде қол жеткізілген келісімдерді жүзеге асыру барысы да талқыланды. Атап айтқанда, сауда-экономикалық байланыстарды дамытуға, көлік-логистика саласындағы әріптестікті кеңейтуге және мәдени-гуманитарлық қатынастарды нығайтуға назар аударылды.

Айта кетейік, 2026 жылдың маусымында Арменияда өткен парламенттік сайлауда Никол Пашинян басқаратын партия жеңіске жеткен болатын.