Қазақстан әлемге танымал Paris Saint-Germain футбол клубының халықаралық академиялар желісіне қосылды. Елордада PSG Academy Kazakhstan ресми түрде ашылып, алғашқы оқу маусымын 2026 жылдың қыркүйегінде бастайды. Алғашқы жылы академия 6-14 жас аралығындағы 300-ге дейінгі жас футболшыны қабылдайды, деп хабарлайды «Dalamedia» ақпараттық порталы.

Жаңа академия Астанадағы Air Arena спорт кешенінде жұмыс істейді. FIFA талаптарына сай жабық алаңда жыл бойы жаттығу өткізуге мүмкіндік бар. Барлық сабақ Paris Saint-Germain клубының ресми әдістемесі негізінде ұйымдастырылады.

Бағдарлама жас футболшылардың техникалық шеберлігін жетілдірумен қатар ойын мәдениетін, дұрыс шешім қабылдау қабілетін, тәртіп пен командалық жұмысты дамытуға бағытталған. Сонымен бірге оқу-жаттығу жиындары, турнирлер, жолдастық кездесулер және халықаралық іс-шараларға қатысу мүмкіндігі қарастырылған.

Қазіргі таңда PSG Academy әлемнің 24 елінде жұмыс істейді. Қазақстандағы академия осы халықаралық желінің бір бөлігіне айналып, болашақта өз жұмысын еліміздің басқа өңірлеріне де кеңейтуді жоспарлап отыр.