Алматы 2026 жылғы жаз маусымын қарқынды мәдени оқиғалармен бастап, алғашқы аптаның өзінде-ақ мыңдаған көрермен жиналған бірқатар ауқымды фестивальдермен есте қалды, — деп хабарлайды «Dalamedia» ақпараттық порталы.

Маусымның басты шараларының бірі халықаралық «Сұңқар» шаңғы трамплиндері кешенінде өткен Beu Fest Almaty фестивалі болды. Биыл ол өзінің бес жылдық мерейтойын атап өтті. Сахнада Ninety One, Қайрат Нұртас, Shiza, Ulukmanapo, Мирбек Атабеков және өзге де танымал өнерпаздар өнер көрсетті.

Жазғы маусымға жаңа серпін берген келесі жоба – «Алатау» дәстүрлі өнер театры аумағында өткен ALMATY SUMMER FEST фестивалі. Ашық аспан астындағы бұл шара қала тұрғындарына музыкалық және интерактивті бағдарламалар ұсынды. Ашылу кешінде Қайрат Нұртас, Луина, Айдана Меденова, ALFA тобы, Ұланғасыр Қами, Аман Ахмет, Arsenaleen, IGIGAI, Akbotiz және DJ Akhmetoff өнер көрсетті.

Жобаның ерекшелігі – оның Алматының Алатау ауданында өткізілуі. Қалалық мәдениет басқармасының мәліметінше, бұл бастама тұрғындардың ірі мәдени іс-шараларға жақын қатысуына мүмкіндік беріп, ауданды отбасылық және жастар демалысының жаңа орталығына айналдырады. Жаз бойы әр сенбі сайын мұнда Open Air форматындағы концерттер өтпек.

Маусымның тағы бір жарқын оқиғасы – The Spirit of Tengri фестивалі болды. Этникалық және заманауи музыканы тоғыстырған бұл кеште Enigma жобасының вокалисі Andru Donalds арнайы қонақ ретінде өнер көрсетті. Ашық аспан астындағы ерекше атмосферадағы концерт жаз басындағы ең есте қаларлық музыкалық оқиғалардың біріне айналды.

Алдағы күндері Алматыда әлемге әйгілі Cirque du Soleil ұжымы OVO қойылымымен өнер көрсетпек. Жәндіктер әлеміне саяхат жасайтын бұл шоу акробатика, жанды музыка және ерекше костюмдермен ерекшеленеді. Қойылымдар «Алматы Арена» кешенінде өтеді.

Бүгінде ірі мәдени іс-шаралар қаланың әртүрлі ауданында ұйымдастырылып келеді. Бұл фестивальдер мен концерттердің қолжетімділігін арттырып қана қоймай, қалалық инфрақұрылымның дамуына және жаңа қоғамдық кеңістіктердің қалыптасуына ықпал етуде. Сонымен қатар мәдени бағдарлама Алматының туристік тартымдылығын күшейтіп, шетелдік және өңірлік қонақтардың қызығушылығын арттырып отыр.

Ауқымды фестивальдер «Таза Қазақстан» және «Заң мен тәртіп» бастамаларының мақсаттарымен де үндес. Іс-шаралар барысында аумақтардың тазалығы, экологиялық мәдениет пен қоғамдық қауіпсіздікті сақтау мәселелеріне ерекше мән берілуде.

Осылайша, Алматы жазғы маусымды мазмұнды мәдени оқиғаларға толы кезеңге айналдырып, өңірдің мәдени астанасы ретін тағы бір мәрте дәлелдеді.