Алматыда өткен Solana фестивалі әлеуметтік желіде қызу талқыланып, көрермендер тарапынан ұйымдастыру сапасына қатысты сын көбейді. Шараға Tyga, Timbaland, Nicole Scherzinger, Flo Rida, Busta Rhymes, John Newman сынды әлемдік жұлдыздар қатысқанымен, жұрт дыбыс сапасы, сахнаның көрінуі және жалпы ұйым деңгейіне көңілдері толмағанын жазды. Кейбірі билет құны 60 мың теңгеге дейін жеткенін айтып, күткен деңгейдегі шоу көре алмағанына шағымданды, — деп хабарлайды «Dalamedia » ақпараттық порталы».

Желіде, әсіресе Threads платформасында, фестивальге барғандар өз тәжірибесін жаппай бөлісіп жатыр. Олардың айтуынша, жұлдызды құрам ауқымды болғанымен, техникалық және ұйымдастырушылық жағы әлсіз шыққан.

Көрермендер ең алдымен дыбыс сапасына шағымданды. Кейбір жазбаларда сахна мен жарықтың дұрыс қойылмауы да айтылған.

«Дыбыс нашар, жүргізушілер әлсіз болды. Арт жақтан сахна көрінбеді, кейін ғана орнымызды ауыстырғанда аздап түзелді», – дейді қатысушылардың бірі.

Тағы бір мәселе – кіреберістегі ұйымдастыру. Адамдардың көптігіне қарамастан, билет тексеру процесі жүйесіз өтіп, ұзын-сонар кезек пен иін тірескен жағдайға әкелгені жазылды.

Бір келуші мұны ең сәтсіз өткен іс-шаралардың бірі деп сипаттап, билет таратушылардың жеткіліксіз екенін және үлкен ағынға дайындық болмағанын сынға алды.

Жеке бір жағдай да әлеуметтік желіде кең тарады. Қолданушылардың бірі концерт кіреберісінде кикілжің шығып, белгісіз қыздың жасөспірімге дөрекілік танытып, жағдайдың ушығуына себеп болғанын жазған. Оның айтуынша, оқиға полицияға дейін жеткенімен, мәселе толық шешілмеген. Кейін сол адамдар қайта жолығып, жанжал жалғасқаны да айтылады.

Көрермендер тек ұйымға емес, қауіпсіздік пен бақылау шараларына да күмән келтірді. Кіреберісте су, темекі, оттық сияқты заттардың алып қойылуы да көпшіліктің ашуын туғызған.

«Ішке кіргенше бәрін алып қояды, тіпті су ішіп үлгеру қиын», – деп жазды тағы бір қатысушы.

Ал VIP-аймаққа қатысты пікірлер де көңілсіз. Кейбір келушілер бос орындардың көп болғанын, ал қарапайым секторда көрініс шектеулі екенін алға тартты. Тіпті бір қолданушы концертті TikTok арқылы сырттай көргенін мысқылмен жеткізген.

Фестиваль барысында продюсер Timbaland-тың өнер көрсетуі де сынға ұшырады. Көрермендер оның сахнада қысқа уақыт болып, әндерді толық орындамағанын атап өтті.

Музыкалық бағдарламаға да сұрақ көп. Желі қолданушылары бірқатар танымал коллаборациялық әндердің неге бірге орындалмағанын түсінбейтінін жазған. Атап айтқанда, ортақ хиттер сахнада толық ашылмағаны сынға іліккен.

Сонымен қатар кейбір қатысушылар концерт соңына дейін шыдамағанын, суық пен жайсыз жағдайға байланысты ерте кетуге мәжбүр болғанын айтты.

Ұйымдастырушыларға қатысты сын мұнымен шектелмеді. Бұған дейін де Алматыдағы ірі концерттерде дыбыс сапасы бойынша ескертулер айтылып жүргені желіде жиі қозғалды.

Дегенмен пікірлер арасында әртістерді жақтағандар да бар. Олар кей орындаушылардың жас ерекшелігі мен ұзақ турлардағы жүктемені ескеріп, сахнадағы мүмкіндіктері шектеулі болуы ықтимал екенін атап өткен.