Президент Қасым-Жомарт Тоқаев Air Astana компаниясының бас атқарушы директоры Ибрагим Жанлыелді қабылдап, әуе тасымалы саласындағы өзекті мәселелерді талқылады, — деп хабарлайды «Dalamedia» ақпараттық порталы.

Кездесу барысында Мемлекет басшысына компанияның қазіргі жұмысы, операциялық және қаржылық көрсеткіштері туралы ақпарат берілді. Air Astana бүгінде Орталық Азия мен Кавказ өңіріндегі жетекші әуе компанияларының бірі саналады.

Компания басшысы Президентке әуе паркін жаңарту жоспарлары туралы баяндады. Атап айтқанда, 2026–2027 жылдары жаңа буын Boeing 787 Dreamliner ұшақтарын енгізу көзделіп отыр.

Air Astana Airbus A320neo және A321neo үлгісіндегі 50 ұшаққа, сондай-ақ Boeing 787-9 маркалы 15 әуе кемесіне тапсырыс берген. Бұл ұшақтар 2036 жылға дейін кезең-кезеңімен жеткізіледі.

Ибрагим Жанлыел компанияның ұзақмерзімді даму стратегиясын таныстырды. Жоспар әуе тасымалының ауқымын кеңейтуге, Қазақстанның өңірлік авиациялық хаб ретіндегі рөлін күшейтуге және халықаралық бағыттарды арттыруға бағытталған.

Кездесуде жаңа бағыттарды ашу, ұшу жиілігін көбейту, мультимодальді тасымалды дамыту және цифрлық технологияларды енгізу мәселелері де айтылды.

Қасым-Жомарт Тоқаев әуе паркін жаңарту мен бағыттар желісін кеңейту маңызды екенін атап өтті. Президент АҚШ және Жапониямен тікелей әуе қатынасын дамыту қажеттігіне назар аударды.

Сонымен қатар Мемлекет басшысы жолаушылар жиі шағым айтатын рейстердің кешігуі, әуе кемелерінің ауысуы сияқты мәселелерді көтерді. Ол компания басшылығын қызмет сапасын арттырып, қазақстандықтар жиі баратын мемлекеттермен әуе байланысын күшейтуге шақырды.