Астана 2027 жылы үстел теннисінен әлем чемпионатын өткізетін қала ретінде ресми түрде бекітілді, ,-деп хабарлайды «Dalamedia» ақпараттық порталы. Турнир туын Қазақстанға табыстау рәсімі Лондонда өтіп жатқан қазіргі әлем чемпионаты аясында ұйымдастырылды.

Осылайша Қазақстан әлемдегі ең беделді спорт жарыстарының бірін қабылдау мәртебесіне ие болды. Әлем чемпионаты 2027 жылдың 22-30 мамыры аралығында елордада өтеді.

Қазақстан Орталық Азия елдері арасында алғаш рет үстел теннисінен әлем чемпионатын өткізгелі отыр. Бұл тек ел спорты үшін ғана емес, бүкіл аймақ үшін маңызды оқиға саналады. Халықаралық деңгейдегі дода отандық үстел теннисінің дамуына серпін беріп, Қазақстанның спорттағы беделін арттыра түспек.

Алдын ала мәлімет бойынша, чемпионатқа спортшылар, бапкерлер, ұлттық федерация өкілдері, төрешілер мен халықаралық делегаттарды қоса есептегенде шамамен 1250 ресми қонақ келеді деп күтілуде. Сонымен қатар жарысқа шетелдік жанкүйерлер мен туристердің де көптеп келуі болжанып отыр.

Дүбірлі дода бес бағыт бойынша өтеді: ерлер мен әйелдер арасындағы жекелей сын, ерлер және әйелдер жұбы, сондай-ақ аралас жұптар сайысы.

Негізгі жарыс алаңы ретінде 8 мыңға жуық көрерменге арналған «Барыс Арена» таңдалды. Ал қосымша матчтар 6,8 мың адам сиятын QAZAQSTAN жеңіл атлетика кешенінде ұйымдастырылады.

Әлем чемпионаты кезінде Астанада ITTF Summit 2027 жиыны да өтеді. Оның аясында Халықаралық үстел теннисі федерациясының Бас ассамблеясы мен Атқару комитетінің отырыстары жоспарланған.

Айта кетейік, 2027 жылғы әлем чемпионатын Қазақстанда өткізу туралы шешім 2025 жылы Дохада өткен ITTF Бас ассамблеясында қабылданған. Дауыс беру қорытындысында Қазақстан 54,68 пайыз қолдауға ие болып, Франция, АҚШ, Қытай және Бразилияны артта қалдырған еді.