Петропавлдағы Абай атындағы мамандандырылған қазақ мектеп-гимназиясында жөндеу жұмыстары кезінде шамамен бес метр биіктіктен құлаған екі техникалық қызметкерге қатысты жаңа мәліметтер белгілі болды, — деп хабарлайды «Dalamedia» ақпараттық порталы.

Зардап шеккен қызметкерлердің бірі Жанна Қапарованың әпкесі екені белгілі болды. Оның айтуынша, мектеп әкімшілігі техникалық қызметкерлерді өз міндетіне кірмейтін қауіпті жұмыстарды орындауға мәжбүрлеген.

«Не осы жұмысты істейсіңдер, не жұмыстан шығасыңдар» деген талап қойылғанын айтқан Жанна Қапарова әпкесінің қазір ауруханада жатқанын жеткізді. Оның сөзінше, әйелдің омыртқасына бірнеше жерден зақым келген және оған операция қажет.

Туыстары бұл жағдайды өндірістегі жазатайым оқиға ретінде бағалап, жауапты тұлғаларға құқықтық баға берілуін талап етіп отыр. Олар зардап шеккен қызметкерлердің жөндеу немесе биікте жұмыс істеу саласына қатысы жоқ екенін атап өтті.

«Олар альпинист те, жөндеу бригадасының қызметкерлері де емес. Олар қарапайым техникалық қызметкерлер. Соған қарамастан еңбек шартында көрсетілмеген жұмыстарды орындауға мәжбүр болған», — деді Жанна Қапарова.

Петропавл қалалық білім басқармасы өкілінің айтуынша, екі қызметкер де мектепте ұзақ жылдан бері жұмыс істеген. Бірі 2008 жылдан, екіншісі 2015 жылдан бері еңбек етеді. Қазір олардың екеуі де ауруханада ем қабылдап жатыр.

Ведомство өкілі алдын ала мәлімет бойынша, оқиға қауіпсіздік талаптарының сақталмауынан болғанын айтты. Сонымен қатар мектепте күрделі жөндеу емес, косметикалық жұмыстар жүргізілгенін жеткізді.

«Қазір еңбек инспекциясының қорытындысын күтіп отырмыз. Тексеру аяқталғаннан кейін оқиғаның барлық мән-жайы және жауапты тұлғалар анықталады», — деді білім басқармасы өкілі.

Еңбек инспекциясы қызметкерден еңбек шартында көрсетілмеген жұмысты талап етуге болмайтынын түсіндірді. Егер жұмыс беруші қосымша міндет жүктесе, ол заң талаптарына сәйкес рәсімделіп, тиісті ақы төленуі керек.

Еске салайық, бұған дейін Солтүстік Қазақстан облысының полиция департаменті аталған дерек бойынша еңбек қауіпсіздігі талаптарын бұзу фактісімен сотқа дейінгі тергеу басталғанын хабарлаған еді. Тергеу барысында оқиғаның барлық мән-жайы анықталып жатыр.