Қонаев гарнизонындағы әскери бөлімдердің бірінде мерзімді әскери қызметші төртінші қабаттың терезесінен құлап, ауыр жарақат алды, — деп хабарлайды «Dalamedia» ақпараттық порталы.

Оқиға 3 тамыз күні болған. Бұл туралы Десанттық-шабуылдау әскерлері Instagram желісіндегі ресми парақшасында мәлімдеді. Ведомствоның хабарлауынша, сарбаз бірден ауруханаға жеткізіліп, оған қажетті мамандандырылған медициналық көмек көрсетіліп жатыр. Дәрігерлер оның жағдайын тұрақты бақылауда ұстап отыр.

Ресми ақпаратқа сәйкес, әскери қызметші бұған дейін қызмет өткеру жағдайына қатысты ешқандай шағым айтпаған. Оқиғадан бір күн бұрын ол ата-анасымен кездескен, олар тарапынан да ешқандай шағым болмаған.

Аталған дерек бойынша Ішкі істер министрлігінің Әскери-тергеу басқармасы қылмыстық іс қозғады. Қазір оқиғаның мән-жайын анықтауға бағытталған тергеу амалдары жүргізіліп жатыр. Сонымен бірге Қорғаныс министрлігі қызметтік тексеріс бастап, арнайы комиссия құрған. Оқиға министрліктің ерекше бақылауына алынған.

Бұл жағдайға қатысты «Аналар жүрегі» сарбаз аналары комитеті де пікір білдірді. Ұйымның мәліметінше, оқиға Қонаев қаласындағы №32363 әскери бөлімінде болған. Ақпарат түскеннен кейін комитет өкілі әскери бөлімге барып, кейін ауруханада жатқан сарбаздың жағдайымен танысқан.

Комитет өкілдері сарбаздың әкесімен, әжесімен, әскери бөлім басшылығымен және сол күні кезекшілікте болған әскери қызметшілермен кездесіп, бастапқы мәліметтерді алғанын хабарлады.

Ұйымның мәлімдеуінше, қазіргі таңда ең маңыздысы – сарбаздың өмірі мен денсаулығы. Комитет оның тезірек сауығып кетуіне тілектестік білдіріп, жағдайды бақылауда ұстайтынын жеткізді.

Сонымен қатар комитет тергеу аяқталғанға дейін қандай да бір қорытынды жасауға ерте екенін атап өтті. Осыған байланысты жұртшылықты расталмаған ақпарат таратпауға шақырып, оқиғаның барлық мән-жайына құқық қорғау органдары жан-жақты әрі объективті баға беруі тиіс екенін мәлімдеді.

Еске салайық, бұған дейін Өскеменде мерзімді әскери қызметші Мархан Айқын Ерланұлы кезекшілік кезінде әскери бөлім аумағынан белгісіз бағытқа кетіп қалған еді. Кейін үш күннен соң ол облыс орталығынан шамамен 20 шақырым жерден табылған болатын.