Астана қаласы полиция департаментінің көші-қон қызметі басқармасы бастығының орынбасары Әлия Мақаеваға қатысты қылмыстық іс аясында соталды тергеу басталып, ол ұсталды, — деп хабарлайды «Dalamedia» ақпараттық порталы.

Бұған дейін әлеуметтік желілерде полиция қызметкерінің заңсыз көші-қонды ұйымдастырды деген күдікке ілінгені туралы ақпарат тараған болатын. Сондай-ақ тергеу шетел азаматтарына Қазақстанда тұруға ықтиярхаттарды заңсыз рәсімдеу деректеріне байланысты жүргізіліп жатқаны айтылды.

Алдын ала мәліметке сәйкес, іс аясында бірнеше мемлекеттік органның қызметкерлері де тексеріліп жатыр. Тергеуді Ішкі істер министрлігінің өзіндік қауіпсіздік бөлімшелері Ұлттық қауіпсіздік комитетімен бірлесіп жүргізуде.

Ұлттық қауіпсіздік комитетінің баспасөз қызметі соталды тергеудің басталғанын растады.

«Қазір соталды тергеу жүргізіліп жатыр. Қылмыстық-процестік кодекстің 201-бабына сәйкес өзге ақпарат жарияланбайды», – делінген ресми хабарламада.

Ашық деректерге сүйенсек, Әлия Мақаева Ресейдің Новгород облысында дүниеге келген. 2001 жылы Орал мемлекеттік заң академиясының заң факультетін бітіргеннен кейін ішкі істер органдарындағы еңбек жолын бастаған.

Қызметін Астанадағы Алматы аудандық ішкі істер басқармасында тәрбие және кадр жұмысы бөлімінің инспекторы ретінде бастаған ол, кейін Есіл аудандық ішкі істер басқармасының көші-қон полициясы бөлімінде, әйелдерді зорлық-зомбылықтан қорғау тобында және елордалық көші-қон қызметінің азаматтық және иммиграция бөлімінде түрлі лауазымдарды атқарды.

2022 жылдың наурыз айында көші-қон қызметі басқармасының азаматтық және иммиграция бөлімінің басшысы болып тағайындалған. Кейін басқарма бастығының орынбасары қызметіне көтерілді.

Ашық ақпараттағы соңғы мәлімет бойынша, 2024 жылдың қаңтарында Әлия Мақаева полиция подполковнигі ретінде таныстырылған. Оның қазіргі арнайы атағы ресми түрде нақтыланбаған.

Еске сала кетейік, Қазақстан Республикасы Конституциясының 77-бабына сәйкес, соттың заңды күшіне енген үкімі шыққанға дейін әр адам кінәсіз деп есептеледі.