Ақтөбе гарнизонының әскери соты Батыс Қазақстан облысындағы «Тасмола» шекара бөлімшесінің бастығы Сұлтан Қонаровқа қатысты қылмыстық істі қарады, — деп хабарлайды «Dalamedia» ақпараттық порталы.

Тергеу деректеріне сай, ол шамамен 20 келісімшарт бойынша жұмыс істейтін әскери қызметкерден жөндеу жұмыстарына деп әрқайсысынан 15 мың теңгеден жинаған. Жиналған ақша бір әскери қызметкердің телефон нөміріне аударылып отырған.

Осы қаражаттың бір бөлігіне Сұлтан Қонаров жеке қарызын жауып, тұрмыстық заттар сатып алған. Сондай-ақ шекара бекеті аумағындағы модульдік үйіне пластик терезелерге тапсырыс бергені белгілі болды. Қалған 60 мың теңгеге жуық соманы қолма-қол алған.

Сонымен қатар ол қарамағындағы әскери қызметкерлерден демалыстан келгенде түрлі заттар алып келуді талап еткен. Олар оған аяқ киім мен сөмке сатып әперген. Кей жағдайларда демалысқа берілетін қаражаттың бір бөлігі де жинап алынған.

Уақыт өте келе заңсыз жиналатын қаражат көлемі 15 мыңнан 100–150 мың теңгеге дейін жеткен. Кейбір әскери қызметкерлер оның дүкендердегі қарыздарын да өтеген. Сонымен қатар аударымдардың бір бөлігі оның жұбайының шотына жіберілген.

Сотта айыпталушы өз кінәсін мойындамай, істі уақытша міндетін атқарған әскери қызметкер ұйымдастырды деп мәлімдеді.

Сот үкімімен Сұлтан Қонаров кінәлі деп танылып, 6 жылға бас бостандығынан айырылды. Сондай-ақ оған өмір бойына әскери және мемлекеттік қызметте жұмыс істеуге тыйым салынды және барлық заңсыз алынған қаражатты қайтару міндеттелді.