Атырау қаласы әкімінің орынбасары Мейіржан Мұқасовтың ұсталғаны жөніндегі ақпарат қоғамда кеңінен талқылануда. Бұл дерекке қатысты Ұлттық қауіпсіздік комитеті сотқа дейінгі тергеп-тексеру жүргізіліп жатқанын растады, -деп хабарлайды «Dalamedia» ақпараттық порталы.

Маусым айының басында бұқаралық ақпарат құралдарында Атырау қаласы әкімінің орынбасары Мейіржан Мұқасовтың ұсталғаны туралы хабар тараған болатын. Осыған байланысты ҰҚК түсініктеме берді.Ведомство мәліметінше, істі ҰҚК департаментінің сыбайлас жемқорлыққа қарсы қызметі қарап жатыр. Қылмыстық іс материалдарында 40 миллион теңгеге қатысты деректер мен тағы бір күдіктінің аты аталады.

Сондай-ақ ақпарат бойынша, ұсталғаннан кейін Мейіржан Мұқасов процессуалдық келісім жасауға ниет білдіргенімен, кейін бұл шешімінен бас тартқан.ҰҚК өкілдері қазіргі уақытта сотқа дейінгі тергеу жалғасып жатқанын мәлімдеді.«Қылмыстық-процестік кодекстің 201-бабының 1-бөлігіне сәйкес өзге мәліметтер жария етілмейді», – деп хабарлады комитет.Бұдан бөлек, Ұлттық қауіпсіздік комитеті «Тұрғын үйлерге қалалық коммуналдық қызмет көрсету» ЖШС бас директорының орынбасарына қатысты да сотқа дейінгі тергеу жүргізіліп жатқанын жеткізді.Кейін адвокат Нұрлан Жолболов қала әкімі мен оның орынбасары аталған қылмыстық іс аясында жауап бергенін мәлімдеді.

Айта кетейік,Мейіржан Мұқасов Атырау қаласы әкімінің орынбасары қызметіне 2025 жылдың қаңтар айында тағайындалған. Оған дейін облыс әкімінің кеңесшісі болған.