Қазақ күресінен танымал балуан, «Қазақстан барысы» республикалық турнирінің екі дүркін жеңімпазы Айбек Нұғымаров Абай облысы Аягөз ауданының әкімі болып тағайындалды, — деп хабарлайды «Dalamedia» ақпараттық порталы.

Жаңа әкімді аудан активіне Абай облысының әкімі Берік Уәли таныстырды. 39 жастағы Айбек Нұғымаров Аягөз ауданының Құндызды ауылында дүниеге келген. Семей мемлекеттік педагогикалық институтында «Дене шынықтыру» мамандығы бойынша білім алып, кейін заңгер мамандығын да меңгерген.

Айбек Нұғымаров – қазақ күресінен бірнеше дүркін әлем чемпионы, қазақ күресі мен самбодан халықаралық дәрежедегі спорт шебері. Ол 2013 және 2019 жылдары өткен «Қазақстан барысы» турнирінде жеңімпаз атанып, түйе палуан атағын иеленген.

Еңбек жолын Семей қаласындағы спорт мектептерінде жаттықтырушы болып бастаған. Кейін білім беру және мемлекеттік қызмет саласында еңбек етіп, Семейдегі Көлік колледжін алты жыл басқарды. Бұған дейін Аягөз ауданы әкімінің орынбасары және аудан әкімінің міндетін уақытша атқарушы қызметтерін атқарған.

Осы тағайындаумен Айбек Нұғымаров Аягөз ауданының әкімі қызметіне ресми түрде кірісті.