Мемлекет басшысы Қасым-Жомарт Тоқаевтың жарлығымен Қанатбек Бақытұлы Жайсаңбаев Қазақстан Халық кеңесі төрағасының орынбасары – Қазақстан Халық кеңесі хатшылығының басшысы қызметіне тағайындалды, — деп хабарлайды «Dalamedia» ақпараттық порталы.

Президент жарлығына сәйкес, Қанатбек Жайсаңбаев бұған дейін атқарған қызметінен босатылды.

Қанатбек Бақытұлы Жайсаңбаев 1980 жылы Қызылорда қаласында дүниеге келген. Ол Қазақ мемлекеттік заң академиясын заңгер мамандығы бойынша және Рысқұлов атындағы Қазақ экономикалық университетін экономика бағыты бойынша тәмамдаған.

Еңбек жолын мемлекеттік қызмет саласында бастаған. 2008-2010 жылдары Қызылорда облысы әкімдігі аппараты басшысының орынбасары, кейін аппарат басшысы қызметтерін атқарды. Сондай-ақ Президент Әкімшілігінде мемлекеттік инспектор, Ішкі саясат бөлімінің басшы орынбасары лауазымдарында жұмыс істеді.

2021-2022 жылдары Президент Әкімшілігінің мемлекеттік бақылау және ұйымдастырушылық-аумақтық жұмыс бөлімін басқарды. 2022-2023 жылдары Мемлекет басшысының көмекшісі және Президент Әкімшілігінің өтініштерді қарауды бақылау бөлімінің меңгерушісі қызметтерін атқарды.

2023 жылдың қыркүйегінен бастап жаңа тағайындауға дейін Президент Әкімшілігінің өтініштерді қарауды бақылау бөлімінің меңгерушісі болды.