Семейде бастауыш сынып мұғалімінің ар-намысы мен іскерлік беделіне нұқсан келтірген мектеп директоры мен оның орынбасары сот шешімімен кешірім сұрауға міндеттелді. Оларға моральдық зиянды өтеу туралы талап та қойылды, — деп хабарлайды «Dalamedia» ақпараттық порталы.

Семей қаласының азаматтық істер жөніндегі ауданаралық сотында мұғалім К-ның ар-намысын, қадір-қасиетін және іскерлік беделін қорғау туралы азаматтық іс қаралды.

Іске мектеп директорына жіберілген дауыстық хабарлама және кейін мектеп ұжымы қатысқан жиында айтылған сөздер себеп болған. Талапкердің айтуынша, жауапкер оның алкогольдік ішімдік ішетіні, жұмысқа мас күйінде келетіні және түстен кейін ішімдікке салынатыны туралы мәлімет таратқан.

Мұғалім бұл ақпараттың шындыққа жанаспайтынын айтып, оны жоққа шығаруды, кешірім сұрауды және моральдық зиян үшін өтемақы төлеуді талап еткен.

Сот барысында мектеп басшылығы таратылған мәліметтердің рас екенін дәлелдейтін жеткілікті дерек ұсына алмағаны анықталды. Психологиялық-филологиялық сараптама қорытындысын ескере отырып, сот мұғалімнің ар-намысы мен іскерлік беделін қорғауға негіз бар деген шешімге келген.

«Таратылған мәліметтер үшінші тұлғаларға жеткізілген, олар талап қоюшының беделіне кері әсер ететін сипатта болған және шындыққа сәйкес келмейді», — делінген сот хабарламасында.

Сот мектеп директоры мен оқу-тәрбие жұмысы жөніндегі директор орынбасарын мұғалімнен кешірім сұрап, бұған дейін айтылған ақпараттарды теріске шығаруға міндеттеді.

Сонымен қатар моральдық зиянды өтеу туралы талап ішінара қанағаттандырылып, сот шығындарын өндіру туралы шешім қабылданды.

Сот шешімі әзірге заңды күшіне енген жоқ.