Ақтөбеде танысын өлтіріп, мәйітін екі күн бойы үйінде ұстап, кейін қоқыс жәшігіне тастаған 63 жастағы ер адам 14 жылға бас бостандығынан айырылды, — деп хабарлайды «Dalamedia» ақпараттық порталы.

Қылмыстық іс Ақтөбе облыстық қылмыстық істер жөніндегі мамандандырылған ауданаралық сотында қаралды. Сот ер адамды Қылмыстық кодекстің 99-бабының 1-бөлігі бойынша кінәлі деп танып, жазасын орташа қауіпсіздік мекемесінде өтеуді белгіледі.

Сот отырысында айыпталушы кінәсін толық мойындамаған. Оның айтуынша, екеуінің арасында жанжал шығып, жәбірленуші пышақпен ұмтылған. Сол сәтте қолын қайырып қалған кезде пышақ өзіне кіріп кеткенін айтып, оқиғаның нақты қалай болғанын есіне түсіре алмайтынын жеткізген.

Алайда тергеу материалдарына сәйкес, қылмыс 2026 жылдың 21 ақпанында болған. Сол күні екі таныс бірге алкоголь ішіп отырған кезде араларында жанжал туындаған. Тергеу нұсқасы бойынша, айыпталушы жәбірленушінің кеуде тұсына бірнеше рет пышақ сұғып, оны өлтірген.

Оқиғадан кейін ер адам мәйітті екі тәуліктен астам уақыт үйінде қалдырған. Кейін денеден құтылу үшін оны бүктеп, аяқ-қолын жабысқақ таспамен орап, үлкен сөмкеге салған. Таңғы сағат төрт шамасында мәйітті шанамен сүйреп апарып, қоқыс жәшігіне тастаған. Кейін оны аула тазалаушы тауып, полицияға хабарлаған.

Сот жәбірленушінің туыстарының азаматтық талабын да қанағаттандырды. Үкімге сәйкес, сотталған азамат 2 миллион теңге моральдық өтемақы мен 1,2 миллион теңге процестік шығын төлеуге міндеттелді.

Сот бұрын сотталмағаны мен кінәсін ішінара мойындауын жеңілдететін мән-жай ретінде ескерді. Ал қылмыстың мас күйінде жасалғаны жауапкершілікті ауырлататын жағдай деп танылды.

Әзірге сот үкімі заңды күшіне енген жоқ. Тараптар оған апелляциялық тәртіппен шағым түсіре алады.