Сотталушы Сұлтан Сәрсемәлиев соңғы сөзінде тағылған айыптарды толық мойындайтынын айтып, жасаған әрекетінің себебін отбасын сақтап қалуға деген талпынысымен байланыстырды. Ол соттан жеңілдік сұрап, бұл өтінішін өзі үшін емес, балалары мен ата-анасы үшін айтып отырғанын жеткізді, — деп хабарлайды «Dalamedia» ақпараттық порталы.

Сәрсемәлиев сот процесі басталғаннан бері өзін ақтауға немесе біреуді кінәлауға тырыспағанын айтты. Оның сөзінше, ол болған жағдай туралы тек өзіне белгілі шындықты жеткізуге ұмтылған.

Сотталушы ауыр жағдайға отбасы үшін күрес, ішкі күйзеліс пен жиналған ашу себеп болғанын мәлімдеді. Ол әйелінен және балаларынан айырылып қалудан қорқып, жағдайды бақылауда ұстай алмағанын айтты.

Сұлтан Сәрсемәлиев өз қолымен жасаған ісін толық мойындайтынын және тағылған баптарға қарсылығы жоқ екенін жеткізді. Сондай-ақ қандай жаза тағайындалса да қабылдайтынын айтты.

Ол мемлекеттен ізгілік танытып, екінші мүмкіндік беруді сұрады.

«Бұл өтінішті өзім үшін емес, ата-анам мен бала-шағам үшін айтып отырмын», — деді Сұлтан Сәрсемәлиев.

Бұған дейін мемлекеттік айыптаушы сотталушыны бірнеше бап бойынша кінәлі деп танып, оған өмір бойына бас бостандығынан айыру жазасын тағайындауды сұраған еді.

Іс материалдарына сәйкес, 2025 жылдың желтоқсанында полицияға 66 жастағы Мақсот Қарабалин, 64 жастағы Насип Өтешқалиева және олардың екі баласының жоғалғаны туралы хабар түскен. Туыстарының айтуынша, отбасы мүшелері қараша айынан бері байланысқа шықпаған.

Тергеу барысында жоғалған ерлі-зайыптылардың мәйіттері үйлердің бірінің шаруашылық құрылысынан табылған. Осыдан кейін іс кісі өлтіру дерегі бойынша қайта сараланған.

Кейін қылмыс жасады деген күдікпен марқұмдардың бұрынғы күйеу баласы Сұлтан Сәрсемәлиевке халықаралық іздеу жарияланды. Ол Индонезия аумағында ұсталып, Қазақстанға жеткізілген.

Тергеу барысында оның берген жауаптары негізінде Атырау қаласындағы үй ауласынан бұрын хабар-ошарсыз кеткен Мирамгүл Қарабалина мен Наурыз Мұқанғалиевтің мәйіттері табылған.