Қостанай қалалық соты сапасыз жасалған ерін пластикасына байланысты азаматтық істі қарап, талапкердің талабын ішінара қанағаттандырды. Лицензиясы мен пластикалық хирург ретінде сертификаты болмаған азаматтан жәбірленушінің пайдасына 1 миллион 367 мың теңге өндірілді, — деп хабарлайды «Dalamedia» ақпараттық порталы.

Іс материалдарына сәйкес, 2024 жылдың қазан айында жауапкер әйелге хейлопластика, яғни ерін пластикасы операциясын жасаған. Ол үшін 120 мың теңге алған. Алайда операция нәтижесіне көңілі толмаған әйел 2025 жылдың сәуірінде қосымша 90 мың теңге төлеп, қайта ота жасатқан.

Кейін жүргізілген тексеру барысында азаматтың пластикалық хирургия саласында медициналық қызмет көрсетуге қажетті лицензиясы мен тиісті сертификаты болмағаны анықталған.

Сот-медициналық сараптама қорытындысы бойынша, операция кезінде тіндердің шамадан тыс алынуы салдарынан әйелдің жоғарғы ернінде тыртықты өзгеріс пайда болған. Сарапшылар хирургиялық араласу мен келтірілген зиян арасында тікелей байланыс бар екенін анықтап, денсаулыққа келген зиянды орташа деңгейдегі зардап деп бағалаған.

Сот жауапкердің арнайы білімі мен рұқсат құжаттары болмағанына, сондай-ақ медициналық құжаттарды дұрыс рәсімдемегеніне назар аударды.

Сот шешімімен әйелге операция үшін төленген 210 мың теңге, моральдық зиян ретінде 700 мың теңге және сараптама шығындары үшін 457 мың теңге өтелетін болды. Жалпы өндірілген сома 1 миллион 367 мың теңгені құрады.

Айта кетейік, соңғы уақытта Қазақстанда пластикалық операцияларға қатысты бірнеше қайғылы жағдай тіркелді. Маңғыстау облысында липосакция жасатқан облыстық мәслихат депутаты Ербол Айтуов операциядан кейін көз жұмған еді. Тексеру барысында клиника жұмысында бірқатар заңбұзушылық анықталған.

Сондай-ақ Алматыдағы пластикалық хирургия клиникаларының бірінде блогер әрі кәсіпкер Сәуле Базархан липосакциядан кейін қайтыс болған. Осыдан кейін аталған мекемеде бұған дейін де осындай операциядан соң адам өлімі тіркелгені белгілі болды.

Осы жағдайлардан кейін Денсаулық сақтау министрлігі пластикалық хирургия қызметін көрсететін ұйымдарға бақылауды күшейтетінін мәлімдеді. Енді медициналық ұйымдардың лицензиялық талаптарды сақтауы, жабдықталуы және пациент қауіпсіздігіне қатысты талаптардың орындалуы жіті тексерілмек.