Қазақстанда аула аумағындағы ортақ тұрақ орындарын өз бетінше иемденуге тыйым салынды. Енді шынжыр, бағана, блокиратор немесе өзге де қоршау орнатып, көлік тұрағын жеке пайдалануға тырысқан тұрғындарға 324 мың теңгеден астам айыппұл салынуы мүмкін, — деп хабарлайды «Dalamedia» ақпараттық порталы.

2026 жылдың 1 шілдесінен бастап абаттандыру саласына қатысты жаңа талаптар күшіне енді. Соған сәйкес көпқабатты үйлердің ауласындағы ортақ тұрақ орындары барлық тұрғындардың пайдалануына арналған аумақ болып саналады.

Жаңа ережеге сәйкес, мұндай орындарды белгілеу үшін шынжыр, темір бағана, блокиратор және басқа да қоршау құралдарын орнатуға болмайды.

Егер тұрғындардың бірі тұрақ орнын заңсыз иемденіп, көлік қоюға кедергі келтірсе, орнатылған құрылғыны өз бетінше алып тастауға тыйым салынады. Мұндай жағдайда азаматтар e-Otinish жүйесі арқылы шағым бере алады.

Құқық бұзушылық анықталған жағдайда, тұрақ орнын қоршаған адамға оны алып тастау міндеттеледі. Ал ортақ пайдаланудағы жерді заңсыз иемденгендерге 75 айлық есептік көрсеткіш көлемінде, яғни 324 450 теңге айыппұл қарастырылған.

Бұл талап жеке меншікке тиесілі тұрақ орындарына қолданылмайды. Егер тұрақ орны тұрғын үй кешеніндегі пәтермен бірге сатып алынған болса, иесі оны заңды түрде пайдалана алады.