Қазақстанда көпқабатты тұрғын үйлердің ауласындағы автотұрақ орындарын өз бетінше иеленуге тыйым салынды. Жаңартылған абаттандырудың үлгілік қағидаларына сәйкес, ауладағы ортақ аумақтарды қоршау, шынжырлау немесе түрлі құрылғылармен бекітуге болмайды, — деп хабарлайды «Dalamedia» ақпараттық порталы.

Жаңа талап бойынша тұрғын үй ауласындағы ортақ пайдаланылатын жерді жеке тұрақ ретінде пайдалануға жол берілмейді. Яғни автокөлік орнын бөлек белгілеп, басқа тұрғындардың көлік қоюына кедергі келтіретін кез келген құрылғыны орнатуға тыйым салынған.

Пәтер иелері кооперативі өкілдерінің айтуынша, мұндай талап бұрын да болған. Алайда кейбір тұрғындар ережеге қарамай, ауладағы орындарды өздеріне бекітіп алған.

«Қоршауға болмайды. Талапты орындамағандарға айыппұл қарастырылған. Бірақ кей азаматтар мұны түсінбей, ортақ аумаққа кедергі келтіретін құрылғылар орнатып қояды», – деді пәтер иелері кооперативінің төрағасы Анастасия Подойникова.

Жаңа тәртіп ауладағы тұрақ мәселесіне жиі тап болатын тұрғындардың қолдауына ие болды. Көпшілік ортақ аумақтың баршаға бірдей қолжетімді болғанын қалайды.

Енді Әкімшілік құқық бұзушылық туралы кодекстің 136-бабына сәйкес, ортақ пайдаланылатын жерді заңсыз иемденген азаматтарға 324 375 теңге көлемінде айыппұл салынып, орнатылған бөгеттер алынып тасталады.