Денсаулық сақтау министрі Ақмарал Әлназарова 15 тамызға дейін елдегі босандыру қызметін көрсететін барлық 69 медициналық ұйымда кешенді тексеру жүргізуді тапсырды. Тексеру барысында санитариялық-эпидемиологиялық талаптардың сақталуы бағаланып, аналар мен жаңа туған нәрестелердің қауіпсіздігін күшейтуге, сондай-ақ ауруханаішілік инфекциялардың алдын алу шараларына басымдық беріледі, -деп хабарлайды «Dalamedia» ақпараттық порталы.

Бұл тапсырма Денсаулық сақтау министрлігінде өткен инфекциялық бақылау жүйесін жетілдіруге арналған аппараттық кеңесте берілді. Министрдің айтуынша, инфекциялық бақылаудың басты мақсаты – инфекция салдарымен күресу емес, оның алдын алу. Сондықтан әрбір жағдай мұқият зерделеніп, медициналық көмектің сапасы мен пациенттердің қауіпсіздігін арттыруға бағытталған нақты шешімдер қабылдануы қажет.

Кеңес қорытындысында инфекция жағдайларын тексеру тәртібін қайта қарау, санитариялық талаптар мен мемлекеттік бақылауда қолданылатын тексеру парақтарын жаңарту, сондай-ақ әрбір жағдайдың туындау себептеріне жан-жақты әрі әділ баға беру тапсырылды. Бұл шаралар еліміздегі инфекциялық бақылау жүйесінің тиімділігін арттыруға бағытталған.

Өңірлік денсаулық сақтау басқармалары медициналық ұйымдарды дезинфекция және зарарсыздандыру жұмыстарына қажетті құрал-жабдықтармен, жеке қорғаныш құралдарымен және бір реттік медициналық материалдармен толық қамтамасыз етуі тиіс. Сонымен қатар медицина қызметкерлерін инфекциялық бақылау талаптары бойынша тұрақты оқыту міндеті жүктелді.

Министрлік антибиотиктерді бақылаусыз қолдану мәселесіне де ерекше назар аударды. Медициналық және фармацевтикалық бақылау комитеті бактерияға қарсы дәрілердің тек рецепт арқылы берілу тәртібін қатаң қадағалайды. Бұл микроорганизмдердің антибиотиктерге төзімділігінің артуына жол бермеуге мүмкіндік береді.

Тексеру аяқталғаннан кейін әр өңірде инфекциялық бақылау жүйесін жетілдіруге арналған арнайы жол карталары әзірленіп, бекітіледі. Министрлік мұндай кешенді шаралар медициналық көмектің қауіпсіздігін күшейтіп, аналар мен нәрестелердің денсаулығын қорғауға және халықтың денсаулық сақтау жүйесіне деген сенімін арттыруға ықпал ететінін атап өтті.