Таразда Қазақстан халқы Ассамблеясы Аналар кеңесінің ұйымдастыруымен «Аналар кеңесі: саналы қоғам қалыптастырудағы ананың рөлі» атты халықаралық форум өтті, ,-деп хабарлайды «Dalamedia» ақпараттық порталы.

Ауқымды жиынға елдің әр өңірінен келген Аналар кеңесінің мүшелері, қоғам белсенділері және шетелдік сарапшылар қатысты. Форум аясында отбасы құндылықтары, ұлттық тәрбие мен қоғамдық келісімді нығайту мәселелері кеңінен сөз болды.

Іс-шараның екінші күні тәжірибе алмасу семинары мен пленарлық отырыс форматында ұйымдастырылды. Талбесік этноорталығында өткен республикалық семинар барысында өңірлік Аналар кеңестерінің атқарып жатқан жұмыстары таныстырылды. Семинарды Республикалық Аналар кеңесі төрағасының орынбасары Баян Ахатай жүргізді.

Форумның пленарлық отырысы Көне Тараз кешенінде жалғасты. Жиында Республикалық Аналар кеңесінің төрағасы Нәзипа Ыдырысқызы «Мәдениетті ана – мәдениетті ұлт» жобасы аясында атқарылып жатқан жұмыстарға тоқталып, бүгінде ел бойынша 1755 Аналар кеңесі жұмыс істейтінін айтты.

Сондай-ақ басқосуда Жамбыл облысы әкімінің бірінші орынбасары Нұржан Календеров, Түркиядан келген профессор Нагехан Еке Учан, Қырғыз Республикасының өкілі Юлия Денисенко және қоғам қайраткерлері сөз алып, отбасы институтын нығайту мен ұлттық бірлік тақырыбын қозғады.

Форум барысында Жамбыл облыстық Аналар кеңесінің «Барыңды бағала» жобасы таныстырылып, өңірлер арасындағы тәжірибе алмасудың маңызы ерекше аталды.

Жиын соңында қоғамдық жұмыстарға белсенді араласып жүрген аналар марапатталды. Тараздағы халықаралық форум өзара тәжірибе бөлісіп, отбасы құндылықтарын дәріптейтін маңызды алаң болды.