Продюсер Баян Алагөзова мен жұбайы Тұрсын Алагөзовтің қазақ киносының аңызы Меруерт Өтекешеваға жасаған сыйы әлеуметтік желіде қызу талқыланып жатыр, ,-деп хабарлайды «Dalamedia» ақпараттық порталы.

Бұған дейін продюсер актрисаға құндыз тон сыйлап, өмірінің соңына дейін ай сайын 1 миллион теңге көлемінде қаржылай қолдау көрсететінін айтқан болатын. Осыған байланысты журналистер Қазақстанның еңбек сіңірген әртісі Меруерт Өтекешеваның өзімен тілдесіп, пікірін білді.

Актрисаның айтуынша, бұл жаңалық өзі үшін де күтпеген жағдай болған. Ол Баян Алагөзовамен осы уақытқа дейін жеке таныс болмағанын жеткізді.

«Бұл жаңалықты мен де әлеуметтік желіден көріп білдім. Баянмен өмірде кездеспеппіз, жеке таныстығымыз жоқ. Бірақ оның жұмысын сырттай бақылап, талантты продюсер ретінде құрметтеймін», – деді Меруерт Өтекешева.

Сондай-ақ көпшіліктің назарын аударған «Қыз Жібек» фильміндегі камзол жайына да тоқталды. Актрисаның сөзінше, түсірілім аяқталғаннан кейін бұл киімді қайта көрмеген.

«Киностудия жабылған кезде костюмдердің бірі костюмердің қолында кетуі мүмкін. Оның кімде болғанын білмеймін. Бірақ 50 жыл бойы сақтап, бүгінге жеткізгеніне ризамын. Камзолдың Баянға өткеніне ренішім жоқ. Ол да өнер адамы, қадірін біледі. Кейін мұражайға өткізетінін айтты», – деді актриса.

Меруерт Өтекешева Баян Алагөзованың бұл әрекетін өнер адамдарына деген құрмет ретінде қабылдайтынын айтты.

«Құман екеуіміз өмір бойы халық үшін еңбек еттік. Бизнесіміз болған жоқ, бір жалақымен жұмыс істедік. Сондықтан Баян жағдайымызды түсініп, осындай ықылас танытып отыр деп ойлаймын», – деді ол.

Әзірге актриса ұсынылған сыйлықты қабылдау-қабылдамау мәселесі бойынша нақты шешім қабылдамаған. Себебі екі тарап әлі жүздесіп, сөйлеспеген.