Қазақстанда бірыңғай QR-код жүйесі іске қосылды. Осыған байланысты Ұлттық банк жаңа жүйеде төлем комиссиясының қалай бөлінетінін түсіндірді. Ведомствоның мәліметінше, QR арқылы төлем жасау картамен есеп айырысудан қымбат болмайды, — деп хабарлайды «Dalamedia» ақпараттық порталы.
19 шілдеден бастап тоғыз банк бірыңғай QR-код жүйесін енгізе бастады. Енді кәсіпкерлер бір ғана терминал арқылы кез келген банктің клиенттерінен QR төлем қабылдай алады.
Жаңа жүйедегі негізгі талап — QR арқылы төлем жасағаны үшін алынатын комиссия көлемі кәдімгі банк картасымен төлеу кезіндегі комиссиядан жоғары болмауы тиіс.
Егер сатып алушы мен сауда орнын қызмет көрсететін банк әртүрлі болса, комиссия мына тәртіппен бөлінеді:
- төлем сомасының 1 пайызы сатып алушының банкіне түседі. Банктер бұл қаражат есебінен клиенттеріне кэшбэк төлейді;
- қалған бөлігі дүкенге қызмет көрсететін банкке беріледі;
- екі банк те осы қаражаттан жүйе операторы — Ұлттық төлем корпорациясына (ҰТК) 0,05 пайыз көлемінде төлем аударады.
Ұлттық банк комиссиялардан ешқандай табыс таппайтынын атап өтті. Ведомство мәліметінше, жаңа жүйе іске қосылған алғашқы екі күннің өзінде оны шамамен 1 миллион адам пайдаланып үлгерген.
Бірыңғай QR жүйесін қолдану немесе бұрынғы POS-терминалдар арқылы төлем қабылдауды жалғастыру — кәсіпкерлердің өз еркінде.
DALAMEDIA admin
6
0