Салтанат Нүкенованың өліміне байланысты сотталған Қуандық Бишімбаевтың інісі Бақытжан Байжанов рақымшылық туралы шешімге сәйкес бостандыққа шықты. Бұл туралы оның адвокаты Ғазиз Ынтықбаев мәлімдеді, — деп хабарлайды «Dalamedia» ақпараттық порталы.

Адвокаттың айтуынша, сот отырысында Байжановқа рақымшылық жасау туралы шешім қабылданып, оны дереу босату жөнінде қаулы шығарылған. Оның өтелмеген жаза мерзімі үш айдан сәл асқан.

Қылмыстық-атқару жүйесі комитеті де Бақытжан Байжановтың рақымшылық негізінде босатылғанын растады. Ведомство мәліметінше, сот қарауы кезінде оның өтелмеген мерзімі 3 ай 18 күн болған. Сонымен қатар оған пробациялық бақылау және алты жыл мерзімге әкімшілік қадағалау белгіленген.

Еске салайық, Астанадағы Bau мейрамханасында болған Салтанат Нүкенованың өліміне қатысты сот үкімімен Қуандық Бишімбаев 2024 жылғы 13 мамырда 24 жылға бас бостандығынан айырылған. Ал Бақытжан Байжанов қылмысты жасыру бабы бойынша төрт жылға сотталған.

2024 жылдың қыркүйегінде Байжанов үкімді қайта қарау туралы кассациялық шағым бергенімен, кейін оны кері қайтарып алған. Кейін ол рақымшылық туралы заң аясында жазасын қысқарту жөнінде сотқа өтініш түсірген.

Сот шешімімен оның жаза мерзімі 8 ай 8 күнге қысқартылған. Бұған дейін Байжанов 1 жыл 11 ай жазасын өтеп үлгерген болатын. Бастапқы есеп бойынша ол 2026 жылдың қарашасында босатылуы тиіс еді.