Жетісу облысындағы Алакөл көлінің жағасындағы Көктұма ауылында паромның соққысынан ауыр жарақат алған 70 жастағы әйелдің екі аяғы ампутацияланды, — деп хабарлайды «Dalamedia» ақпараттық порталы.

Жетісу облысы денсаулық сақтау басқармасының TINFO.kz басылымына берген мәліметіне сәйкес, зардап шеккен әйел ауруханаға өте ауыр жағдайда жеткізілген. Дәрігерлер оған көп қан жоғалту мен травмалық шок диагнозын қойған.

Науқастың жағдайын ескерген мамандар шұғыл консилиум өткізіп, оның өмірін аман алып қалу үшін дереу ота жасауға шешім қабылдаған. Соның нәтижесінде әйелдің екі аяғы да жамбас тұсынан кесілген.

Оқиғаға байланысты Жетісу облысы полиция департаменті қылмыстық іс қозғады. Қазір оқиғаның барлық мән-жайы анықталып жатыр.

Еске салайық, қайғылы жағдай Алакөлдегі Көктұма ауылында болған. Алдын ала мәлімет бойынша, паром кері қозғалған кезде 70 жастағы әйелді қағып кеткен. Оқиға орнында оған алғашқы медициналық көмек көрсетіліп, кейін ауруханаға жеткізілген.