Абай облысындағы «Семей орманы» мемлекеттік орман табиғи резерваты аумағында тұтанған ірі орман өрті оқшауланды. Ашық жалын толық сөндірілгенімен, бықсып жатқан ошақтарды толық өшіру жұмыстары әлі де жалғасып жатыр. Экология және табиғи ресурстар министрлігінің мәліметінше, мамандар өрттің қайта тұтануына жол бермеу үшін тәулік бойы жұмыс істеп жатыр, деп хабарлайды «Dalamedia» ақпараттық порталы.

Өртті ауыздықтауға Абай, Шығыс Қазақстан және Павлодар облыстарының, сондай-ақ Астана қаласының төтенше жағдайлар қызметтері, әскери бөлімдердің жеке құрамы жұмылдырылды. Жалпы 800-ге жуық адам, 176 техника және 7 тікұшақ тартылған. Мамандардың айтуынша, өрт жақын маңдағы елді мекендерге тарамаған. Ал жалын шамамен 370 гектар аумақты шарпыған.

Орман шаруашылығы және жануарлар дүниесі аумақтық инспекциясының басшысы Мұхит Рамазановтың сөзінше, өрт басталғалы бері сөндіру жұмыстары бір сәтке де тоқтаған жоқ. Әуеден жүргізілген жұмыстарға 7 тікұшақ қатысып, өрт ошақтарына 219 мәрте ұшып, жалпы 474 тонна су төккен. Соның нәтижесінде жалынның таралуына тосқауыл қойылып, жердегі күштердің өртті оқшаулауына мүмкіндік туған.

Экология және табиғи ресурстар министрі Ерлан Нысанбаевтың айтуынша, кеше өрт өте күрделі жағдайда болған. Қазір тек бықсып жатқан учаскелер ғана қалған. Олар толық сөндірілгеннен кейін ғана өрт толық жойылды деп есептеледі.

Қазіргі таңда өрт ошағындағы жағдай тұрақты бақылауда. Мамандар бықсыған аумақтарды толық сөндіруге тағы бірнеше күн қажет болуы мүмкін екенін айтады. Өрттің шығу себебі әзірге анықталған жоқ. Сөндіру жұмыстарына аптап ыстық пен екпінді жел кедергі келтіріп отырғанымен, құтқарушылар мен орман қызметкерлері өрттің қайта тұтануына жол бермеу үшін жұмысты үздіксіз жалғастырып жатыр.