Маңғыстау облысында шегірткенің жаппай таралуы тіркеліп, тұрғындар арасында алаңдаушылық туғызды. Әлеуметтік желілерде зиянкестің қаптағаны туралы жазбалар көбейгеннен кейін өңірде шегірткеға қарсы ауқымды өңдеу жұмыстары қолға алынды, — деп хабарлайды «Dalamedia» ақпараттық порталы.

Жергілікті тұрғындар Instagram желісінде шегірткенің күрт көбейгенін айтып, оның ауыл шаруашылығына зиян келтіріп жатқанын жеткізуде.

Маңғыстау облыстық аумақтық инспекциясы басшысының міндетін атқарушы Жолдас Сағынғали өңірде шегіртке зиянкестерінің таралу деректері тіркелгенін айтты. Оның сөзінше, бұған соңғы уақытта жиі жауған жауын-шашын мен қолайлы ауа райы себеп болған.

Ведомство мәліметіне сәйкес, аумақтық инспекция мамандары әдістемелік орталық өкілдерімен бірлесіп, тұрақты мониторинг және тексеру жұмыстарын жүргізіп жатыр. Зиянкестер таралған және шекті деңгейден асқан аумақтар анықталып, тиісті органдарға жолдануда.

Химиялық өңдеу жұмыстарын мердігер ұйым — «Магтоксин» ЖШС жүзеге асырып жатыр. Бекітілген жоспарға сәйкес, барлығы 11,1 мың гектар жер өңделуі тиіс. Оның ішінде Бейнеу ауданында 9,1 мың гектар, Маңғыстау ауданында 2 мың гектар алқап қамтылады. Қазіргі уақытта Бейнеу ауданында 4,3 мың гектар жерге өңдеу жүргізілген.

Мамандар зиянкестердің санын азайту және олардың таралуын тежеу мақсатында ертең Тұщықұдық ауылдық округінде де химиялық өңдеу жұмыстары жалғасатынын мәлімдеді.