Түркияның Стамбұл қаласындағы сот Израиль премьер-министрі Биньямин Нетаньяхуды Интерполдың «қызыл хабарламасы» арқылы халықаралық іздеуге жариялау туралы шешім қабылдады, — деп хабарлайды «Dalamedia» ақпараттық порталы.

БАҚ мәліметінше, мұндай қаулыны Стамбұлдың 11-қылмыстық соты «Сумуд» («Табандылық») жаһандық флотилиясының ұсталуына қатысты талап-арызды қарау барысында шығарған. Судьялар алқасы Нетаньяхуды аса қауіпті қылмыскер ретінде Интерполдың Red Notice жүйесі арқылы іздеуге жариялау жөнінде шешім қабылдаған.

Еске салсақ, 2025 жылдың қараша айында Стамбұлдың Бас прокуратурасы Биньямин Нетаньяху мен Израильдің бірнеше жоғары лауазымды тұлғасын Газа секторында геноцид жасады деген күдікпен қамауға алу туралы ордер берген.

Тергеу 2025 жылдың қазан айында Израиль билігі Газа секторына гуманитарлық көмек жеткізуге бағытталған «Сумуд» жаһандық флотилиясының белсенділерін ұстағаннан кейін басталған.

Кейін Израиль тарапы ұстап, Түркияға депортациялаған флотилия мүшелерін дәрігерлер, оның ішінде психологтар тексерген. Тергеу барысында жиналған материалдар адамзатқа қарсы қылмыстарға қатысты дәлел ретінде іс құжаттарына енгізілген.