Ливан мен Израиль арасындағы уақытша бітім тағы үш аптаға ұзартылды, -деп хабарлайды «Dalamedia» ақпараттық порталы. Бұл жөнінде АҚШ президенті Дональд Трамп өзінің Truth Social желісіндегі парақшасында мәлімдеді.

Ақ үй басшысының айтуынша, мұндай шешім Вашингтонда Израиль мен Ливан өкілдерімен өткен кездесулерден кейін қабылданған. Сондай-ақ АҚШ Ливанға Хезболла тарапынан төнетін қауіптің алдын алу бағытында қолдау көрсетуді жалғастыратыны айтылды.

Трамп алдағы уақытта Биньямин Нетаньяху мен Ливан президенті Джозеф Аунды Вашингтонда қабылдауды жоспарлап отырғанын да жеткізді.

Еске сала кетейік, 16 сәуірде АҚШ басшысы екі ел арасында 10 күндік бітім жасалғанын жариялаған еді. Бұған дейін Ақ үйде соңғы 34 жылда алғаш рет Ливан мен Израиль арасында тікелей келіссөздер өткен болатын.

Алайда келісімге қарамастан, өңірдегі ахуал әлі де күрделі күйінде қалып отыр. Ливан тарапы Израильді әуе соққысын жасады деп айыптап, салдарынан журналист қаза тауып, тағы бір тілші жараланғанын мәлімдеді. Ал Израиль әскері бұл әрекетін өз қауіпсіздігін қамтамасыз ету қажеттілігімен түсіндірді.

Айта кетейік, Ливанда атысты тоқтату мәселесі Иран мен АҚШ арасындағы келіссөздерде де негізгі талаптардың бірі ретінде көтерілген. Қазір бұл бағыттағы келіссөздердің нәтижесі әзірге белгісіз.