Педагогтерді аттестаттау тәртібіне бірқатар өзгеріс енгізілді. Жаңартылған қағидаға сәйкес, рәсім Еңбек кодексі, «Білім туралы», «Педагог мәртебесі туралы» заңдары және мемлекеттік қызмет көрсету талаптарына сәйкес жүзеге асырылады, -деп хабарлайды «Dalamedia» ақпараттық порталы.

Жаңа құжатпен бірге «біліктілік санаты» ұғымының да жаңартылған редакциясы бекітілді. Енді бұл ұғым педагогтің кәсіби құзыреттілік деңгейін кәсіптік стандарттар мен лауазымдарға қойылатын біліктілік талаптарына сай айқындайды.

Сондай-ақ аттестаттауға өтініш беру тәртібі де өзгерді. «Педагог-модератор» және «педагог-сарапшы» санаттарына мемлекеттік қызмет арнайы платформа арқылы көрсетіледі. Ал «педагог-зерттеуші», «педагог-шебер», сондай-ақ білім беру ұйымдарының басшылары мен олардың орынбасарлары біліктілік санатына өтінішті «Цифрлық үкімет» веб-порталы арқылы жолдайды.

Аттестаттаудан өту үшін өтініш, диплом, қайта даярлау туралы құжат (бар болса), еңбек өтілін растайтын құжат, біліктілікті арттыру сертификаты, қолданыстағы санатты растайтын құжаттар (бар болса), кәсіби жетістіктерді дәлелдейтін материалдар, білім алушылардың жетістіктерін растайтын құжаттар және көлемі 250–300 сөз болатын эссе қажет.

Ал жеке куәлік, білімі мен еңбек өтіліне қатысты мәліметтер мемлекеттік органдардың цифрлық жүйелерінен электрондық үкімет арқылы автоматты түрде алынады.