Бразилия президенті Луис Инасио Лула да Сильва әлем чемпионатындағы сәтсіздіктен кейін ұлттық құрама ойыншыларының әрекетіне наразылық білдірді. Ол турнирдің 1/8 финалындағы жеңілістен соң команданың көп мүшесі елге бірге қайтпағанын сынады, — деп хабарлайды «Dalamedia» ақпараттық порталы.

Жергілікті БАҚ мәліметінше, Бразилия футбол конфедерациясының ұшағы Рио-де-Жанейроға 26 ойыншының ішінен тек бір футболшымен — қорғаушы Даниломен ғана оралған. Ұшақта сондай-ақ жаттықтырушылар штабы мен федерация қызметкерлері болған.

Ал қалған ойыншылар әлем чемпионатындағы жеңілістен кейін демалысқа кеткен немесе жаңа маусымға дайындық жүргізу үшін өз клубтарына қайтқан.

Бұл жағдай ел президентінің сынына себеп болды. Луис Инасио Лула да Сильва Бразилия құрамасының бас бапкері Карло Анчелоттиге хабарлама жолдағанын айтты.

«Ұлттық құрама ұшағында ешкім жоқтың қасы. Бұл – ұят жағдай. Сол ұшақпен тек бір ойыншы ғана оралды, қалғандары сонда қалды. Егер олар турнирде жеңіске жетсе, барлығы осында тойлап жүрер еді», – деді президент.

Еске сала кетейік, Бразилия құрамасы әлем чемпионатының 1/8 финалында Норвегиядан 2:1 есебімен жеңілген болатын. Норвегиялық шабуылшы Эрлинг Холандтың дубль жасауы командасына жеңіс әкелді.