Ақтөбе тұрғыны интернет-дүкеннен тапсырыс берген 1000 теңгелік зат үшін қылмыстық жауапкершілікке тартылды. Оның сатып алған бұйымы заң бойынша алып жүруге тыйым салынған суық қару болып шықты, — деп хабарлайды «Dalamedia» ақпараттық порталы.

Ақтөбе қалалық сотының мәліметінше, азамат қытайлық Pinduoduo маркетплейсі арқылы кастетке тапсырыс берген. Арзан бағаға алған затын өзімен бірге алып жүрген ол кейін компьютер клубына барған.

Кейін саябақ аумағында күдік тудырған ер адамды Ақтөбе қаласы полиция басқармасының патрульдік қызметкерлері тоқтатқан. Тексеру кезінде оның жанынан заңмен тыйым салынған зат табылған.

Сараптама қорытындысы бойынша, тәркіленген бұйым суық қару ретінде танылған. Сотта азамат өз кінәсін толық мойындап, жасаған ісіне өкінген. Сондай-ақ оның бұған дейін сотталмағаны ескерілген.

Сотталушының кінәсі оның мойындауынан бөлек, полиция қызметкерінің рапорты, маман қорытындысы және басқа да дәлелдермен расталған.

Ақтөбе қаласының №2 соты ер адамды Қылмыстық кодекстің 287-бабы 1-бөлігі бойынша кінәлі деп танып, оған 40 сағат қоғамдық жұмыс жазасын тағайындады.

Сот үкімі қазіргі уақытта заңды күшіне енген.