22 жастағы қазақстандық Ернұр Алмахан Біріккен Араб Әмірліктерінде өмір бойына бас бостандығынан айырылған. Ол 2024 жылы жұмыс іздеп Дубайға кеткен. Жақындарымен тұрақты байланыста болған жігіт соңғы сөйлесулерінің бірінде өзіне жала жабылғанын айтқан, — деп хабарлайды «Dalamedia» ақпараттық порталы.

Қазақстан Сыртқы істер министрлігі 14 сәуірде оның өмір бойына сотталғанын растағанымен, нақты қандай бап бойынша айып тағылғаны жарияланған жоқ. Ернұрдың отбасы бұл жағдайды алғаш рет оның өзінен естіген. Изолятордан хабарласқан ол ата-анасына өзін жазықсыз екенін айтып, ақталатынына сендірген. Алайда жақындары оқиғаның нақты неден басталғанын, қандай айып тағылғанын біле алмаған.

2026 жылдың наурыз айында БАӘ сотының бірінші инстанциясы Ернұр Алмаханға қатысты үкім шығарып, оны өмір бойына бас бостандығынан айырған. Қазіргі уақытта іс апелляциялық сатыда қаралып жатыр.

Бұған дейін Дубайда болған тонау оқиғасына байланысты Ернұр Алмаханның есімі аталған еді. 2025 жылдың басында Finiko қаржы пирамидасының жетекшісіне жасалған шабуылға қатысты бес қазақстандық күдікке ілінгені жөнінде ақпарат тараған. Сол тізімде Ернұр Алмаханның да аты болған.

Оқиға 2025 жылдың 1 қаңтарына қараған түні Дубайдағы жеке виллада болған. Алдын ала мәлімет бойынша, Қазақстанның екі азаматы — Анорбек Тюмибаев пен Есболат Кенжеғазы үй аумағына кіріп, Ресей мен Түркия азаматы Эдвард Сабиров пен оның жұбайына шабуыл жасаған. Кейін бұл іске тағы үш қазақстандықтың қатысы болуы мүмкін екені айтылды.

Журналист Михаил Козачков жариялаған дерекке сүйенсек, күдіктілер қатарында Ернұр Алмаханмен бірге Нұржігіт Қалыбеков пен Абзал Түкен де болған. Олардың барлығы әр кезеңде Алматыдан Біріккен Араб Әмірліктеріне ұшып барғанымен, елге қайта оралмаған.

Дубай полициясының мәліметінше, күдіктілер оқиғадан кейін Ресей мен Түркияға кеткен. 2025 жылдың 4 қаңтарында Анорбек Тюмибаев пен Есболат Кенжеғазы Ресей аумағында ұсталғаны хабарланды. Олар Мәскеудегі Внуково және Домодедово әуежайларында қолға түскен. Тергеу барысында ұсталғандардың жанынан ақша табылмаған. Болжам бойынша, күдіктілер қаражатты елден шықпай тұрып криптовалютаға айналдырып үлгерген болуы мүмкін.