АҚШ президенті Дональд Трамп Ормуз бұғазы арқылы өтетін кемелерге қатысты жаңа талаптар енгізілетінін мәлімдеді. Ол Иранға бағытталған шектеулерді қайта күшейтіп, кейбір кемелер тасымалдайтын жүктерге 20 пайыздық тариф салынатынын айтты, — деп хабарлайды «Dalamedia» ақпараттық порталы.

Трамп бұл туралы өзінің Truth Social әлеуметтік желісіндегі парақшасында жазды. Оның айтуынша, жаңа шаралар тек Иран кемелеріне және Иранмен байланысы бар компанияларға тиесілі теңіз көліктеріне қатысты болады.

«Ормуз бұғазы ашық күйінде қалады. Бұл шектеулер тек Иран кемелеріне немесе Иранмен байланысы бар компаниялардың кемелеріне қолданылады. Ал басқа елдер бұғазды еркін пайдалана алады», – деп мәлімдеді АҚШ президенті.

Сондай-ақ Трамп Вашингтон бұдан былай Ормуз бұғазындағы қауіпсіздікті қамтамасыз етуге жауапты болатынын айтты. Оның сөзінше, енгізілетін тарифтер теңіз жолдарының қауіпсіздігін қамтамасыз етуге жұмсалатын шығындарды өтеуге бағытталған.

АҚШ президенті Fox News арнасына берген сұхбатында Вашингтонның бұғаздағы бақылауды күшейтетінін де мәлімдеді. Бұған дейін Иран Ислам революциясы сақшылары корпусының әскери-теңіз күштері АҚШ аймақтағы әрекетін тоқтатпаса, Ормуз бұғазын жабу мүмкін екенін айтқан болатын.

АҚШ Әскери-теңіз күштері жанындағы Біріккен теңіз ақпараттық орталығының мәліметінше, Иран тарапынан жасалған мәлімдемелерге қарамастан, Ормуз бұғазы әзірге ашық күйінде тұр.

Аймақтағы жағдай әлі де күрделі. Тараптар бір-бірін бұрынғы келісімдерді бұзды деп айыптап, қарама-қайшы мәлімдемелер жасауда.

Бұған дейін Дональд Трамп АҚШ пен Иран арасындағы бітімнің тоқтағанын мәлімдеген еді. Сонымен бірге ол келіссөздерді жалғастыру мүмкіндігін жоққа шығармаған. Ал Иран Сыртқы істер министрі Аббас Арақчи Вашингтонды өзара түсіністік туралы меморандум талаптарын орындамады деп айыптады.