АҚШ әскері Ормуз бұғазындағы коммерциялық кемелерге жасалған шабуылдарға жауап ретінде Иран аумағындағы бірқатар нысанға әуе соққысын жасады, — деп хабарлайды «Dalamedia» ақпараттық порталы.

АҚШ Орталық қолбасшылығының (CENTCOM) мәліметінше, операция халықаралық су жолында жүрген азаматтық басқарудағы кемелерге жасалған шабуылдарға жауап ретінде жүргізілген. Америкалық тарап бұл әрекетті Иранның атысты тоқтату жөніндегі келісімді бұзуы деп бағалады.

«Иранның бұл әрекеті еш негізсіз әрі қауіпті болды. Ол бітімгершілік келісімін өрескел бұзды», — делінген CENTCOM мәлімдемесінде.

Америкалық ведомство соққы нақты қандай нысандарға бағытталғанын ашып айтпаған. Ал Иранның Tasnim ақпарат агенттігі елдің оңтүстігінде бірнеше жарылыс болғанын хабарлады. Ирандық БАҚ АҚШ-ты келісімді бұзды деп айыптады.

Кейінірек Axios басылымы дереккөздеріне сүйене отырып, АҚШ әуе шабуылдары кезінде Иранның әуе қорғаныс жүйелері, жағалау бақылау кешендері, зениттік-зымыран қондырғылары, кемеге қарсы зымыран орындары, ұшқышсыз ұшу аппараттарының ұшыру алаңдары және порт инфрақұрылымы нысанаға алынғанын жазды.

Жағдай Ормуз бұғазында үш коммерциялық кемеге жасалған шабуылдардан кейін күрделене түсті. 7 шілдеде болған оқиғалардың бірі Катардың газ тасымалдаушы кемесіне қатысты болды. Катар билігінің мәліметінше, кемеге Иранның ұшқышсыз ұшу аппараты соққы жасаған.

Сондай-ақ Оман жағалауында Сауд Арабиясының туымен жүрген мұнай тасымалдаушы танкер зақымданған. Алдын ала мәлімет бойынша, бұл Wedyan супертанкері болуы мүмкін. Алайда зақымның нақты себебі әзірге анықталған жоқ.

АҚШ шенеунігі Reuters агенттігіне Иран үш сауда кемесіне оқ атқанын айтқан. Дегенмен Тегеран бұл шабуылдарға жауапкершілікті мойындаған жоқ. Иран Сыртқы істер министрлігі елдің халықаралық міндеттемелерін орындап отырғанын мәлімдеп, Иранмен келісілмеген бағыттарда жүрген коммерциялық кемелер қауіпке ұшырауы мүмкін екенін ескертті.

Бұл АҚШ әскері 26 маусымнан бері Иран аумағындағы нысандарға жасаған алғашқы соққы болды. Бұған дейін де Вашингтон өз әрекетін коммерциялық кеме қатынасына жасалған шабуылдарға жауап деп түсіндірген.

Сонымен қатар АҚШ Ормуз бұғазындағы оқиғалардан кейін Иран мұнайын сатуға мүмкіндік берген лицензияның күшін жойды. Барлық келісімдер 17 шілдеге дейін аяқталуы тиіс.

Еске салайық, 4 шілдеде Тегеранда Иранның бұрынғы Жоғарғы көшбасшысы Әли Хаменейді ақтық сапарға шығарып салу рәсімі өткен болатын. Қоштасу шаралары 9 шілдеге дейін жалғасады. Осыған байланысты Иранның Ислам революциясы сақшылары корпусы елге жасалуы мүмкін кез келген шабуылдан сақ болуға шақырған.

Ал АҚШ президенті Дональд Трамп Иранға жерлеу рәсімдері аяқталғанға дейін «бір апталық тыныштық» берілетінін мәлімдеген еді.