Президент Қасым-Жомарт Тоқаев бірқатар мемлекеттердегі Қазақстанның Төтенше және өкілетті елшілерін тағайындау туралы жарлықтарға қол қойды, деп хабарлайды «Dalamedia» ақпараттық порталы.

Жарлыққа сәйкес, Рапиль Жошыбаев Қазақстанның Қырғызстандағы елшісі қызметінен босатылды. Оның орнына Әбілқайыр Сқақов тағайындалды.

Сондай-ақ Арман Исагалиев Қазақстанның Катардағы елшісі қызметінен босатылып, бұл қызметке Бақыт Батыршаев келді.

Қазақстанның Мажарстандағы елшісі Абзал Сапарбекұлының орнына Әнел Бақытбекқызы тағайындалды.

Ал Мәди Атамқұлов Қазақстанның Сербиядағы елшісі қызметінен босатылып, оның орнына бұған дейін Армениядағы Қазақстан елшісі болған Болат Иманбаев тағайындалды. Осыған байланысты Болат Иманбаев Армениядағы қызметінен де босатылды.

Сонымен қатар, Қазақстанның Үндістандағы елшісі Азамат Есқараевқа Бангладеш, Бутан, Мальдив Республикасы және Непалдағы Қазақстанның қоса атқаратын елшісі міндеті жүктелді.