Астана соты Олимпиада чемпионы Данияр Елеусіновке қатысты әкімшілік іс бойынша шешім шығарды. Боксшы мас күйінде көлік жүргізіп, бірнеше жол-көлік оқиғасына себеп болғаны үшін 20 тәулік әкімшілік қамауға алынды, сондай-ақ 7 жылға көлік басқару құқығынан айырылды, — деп хабарлайды «Dalamedia» ақпараттық порталы.

Істі Астана қаласының мамандандырылған ауданаралық әкімшілік құқық бұзушылықтар жөніндегі соты қараған. Сот мәліметінше, Данияр Елеусінов алкогольдік мас күйде көлік жүргізіп, елорда көшелерінде үш жол апатын жасаған.

Сот отырысында спортшы өз кінәсін толық мойындаған.

Іс материалдарына сәйкес, жүргізуші алдымен жер асты автотұрағы қақпасының тірегіне соғылған. Кейін басқа көлікпен соқтығысып, оның соққы әсерінен тағы бір автокөлікке зақым келген. Сондай-ақ Kia Sportage көлігімен соқтығысқаннан кейін, ол Toyota Hilux автокөлігіне барып соғылған.

Сот оның кінәсі медициналық куәландыру қорытындысы, әкімшілік құқық бұзушылық туралы хаттамалар, жол-көлік оқиғаларының сызбалары, бейнежазбалар және басқа да дәлелдер арқылы расталғанын атап өтті.

Медициналық сараптама нәтижесінде спортшының жеңіл дәрежеде алкогольдік мас күйде болғаны анықталған.

Айта кетейік, Данияр Елеусінов — 2016 жылғы Олимпиада чемпионы, 2013 жылғы әлем чемпионы, Азия ойындарының екі дүркін жеңімпазы және Азия чемпионаттарының бірнеше дүркін жүлдегері.