Жамбыл облысында полицейлер ірі көлемдегі есірткі затын тәркіледі. Көліктен 8 келі 500 грамм марихуана табылып, күдіктіге қатысты сотқа дейінгі тергеу басталды, — деп хабарлайды «Dalamedia» ақпараттық порталы.

Шу алқабынан есірткінің заңсыз тасымалдануына жол бермеу мақсатында жүргізіліп жатқан жедел іс-шаралар барысында кезекті дерек анықталды. Оқиға Шу – Қайнар автожолында тіркелген.

«Қарасора – 2026» және «Канал – Янтарный берег» республикалық жедел алдын алу шаралары аясында Жамбыл облысы полиция департаменті есірткі қылмысына қарсы іс-қимыл басқармасының қызметкерлері ВАЗ-21213 автокөлігін тоқтатқан. Көлікті Шу ауданының тұрғыны басқарған.

Тексеру кезінде автокөліктен есірткі заты салынған қап табылған. Сараптама нәтижесінде оның 8 келі 500 грамм марихуана екені анықталды.

Тінту жұмыстарына «Бүркіт» арнайы бөлімшесінің қызметкерлері мен Хэппи есімді қызметтік-іздестіру иті тартылған.

Полиция мәліметінше, жыл басынан бері мобильді топтар Жамбыл облысынан еліміздің өзге өңірлеріне есірткіні заңсыз тасымалдаудың сегіз арнасының жолын кескен.

Аталған дерек бойынша есірткі заттарын аса ірі мөлшерде өткізу мақсатында заңсыз иемдену, сақтау, тасымалдау, жөнелту немесе өткізу фактісі бойынша сотқа дейінгі тергеу жүргізіліп жатыр.