Алматы облысының Қарасай ауданында жеке үйді синтетикалық есірткі өндіретін жасырын зертханаға айналдырған азамат ұсталды, — деп хабарлайды «Dalamedia» ақпараттық порталы.

Ішкі істер министрлігінің мәліметінше, 29 жастағы ер адам үй сатып алып, оны заңсыз есірткі өндіруге арнайы жабдықтаған. Тергеу барысында оның химиялық реагенттер мен қажетті құрал-жабдықтарды интернет арқылы сатып алғаны анықталды.

Тінту кезінде 28 келіден астам α-PVP, 880 литр прекурсор және зертханалық құрылғылар тәркіленген.

Ресми ақпаратқа сәйкес, дайындалған алғашқы синтетикалық есірткі партиясы шамамен 125 мың бір реттік дозаға тең болған. Алайда оның ешбір бөлігі заңсыз айналымға түспеген, бұл мыңдаған адамның денсаулығына төнуі мүмкін қауіптің алдын алуға мүмкіндік берген.

Құзырлы органдардың хабарлауынша, Алматы облысындағы синтетикалық есірткі тарату арналарының бірі толықтай тоқтатылған.

Аталған дерек бойынша Қылмыстық кодекстің 297-1-бабы, яғни есірткі және психотроптық заттарды өткізу мақсатында заңсыз дайындау, өндіру дерегімен сотқа дейінгі тергеу басталды. Бұл бап бойынша ең қатаң жаза — өмір бойына бас бостандығынан айыруға дейін қарастырылған.