Қазақстанда 2030 жылға дейін жаңа газ өңдеу қуаттары іске қосылып, тауарлық газ өндіру көлемі артады, — деп хабарлайды «Dalamedia» ақпараттық порталы.

Бұл туралы Үкімет отырысында энергетика министрі Ерлан Ақкенженов мәлімдеді. Оның айтуынша, ішкі тұтынуға арналған тауарлық газ өндірісі 2032 жылға қарай 35,5 миллиард текше метрге дейін жеткізіледі. Бұл 2025 жылғы көрсеткішпен салыстырғанда 29,6 пайызға артық.

Министрдің сөзінше, өндіріс көлемінің өсуі Қашаған мен Қарашығанақ кен орындарында жаңа газ өңдеу қуаттарын іске қосу есебінен қамтамасыз етіледі. Бұл жобалар газ инфрақұрылымын кеңейтіп, өңірлерді тұрақты отынмен қамтамасыз етуге мүмкіндік береді.

«2027-2030 жылдар аралығында тауарлық газдың қосымша көлемі 1,6 миллиард текше метрге жетеді. Ал 2031 жылы бұл көрсеткіш 2,3 миллиард текше метрді, 2032 жылы 6,6 миллиард текше метрді құрайды», — деді Ерлан Ақкенженов.

Оның айтуынша, саладағы негізгі міндеттердің бірі — маңызды инфрақұрылымдық нысандарды белгіленген мерзімде іске қосу.

Биыл қазан айында «Талдықорған – Үшарал» магистральдық газ құбыры пайдалануға берілмек. Сонымен қатар жыл соңына дейін «Бейнеу – Бозой – Шымкент» газ құбырының екінші желісінің бірінші кезеңін аяқтау жоспарланып отыр. Ал екінші кезеңі 2029 жылы іске қосылады. Бұл жобалар арқылы газ тасымалдау мүмкіндігі жылына 15 миллиард текше метрге дейін артады.

Жоспар бойынша 2027 жылы Қашағанда қуаты жылына 1 миллиард текше метр болатын газ өңдеу зауыты, ал Жаңаөзенде жылына 0,9 миллиард текше метр газ өңдейтін ҚазГӨЗ іске қосылады.

Сонымен бірге 2030 жылға дейін Қашағанда қуаттылығы жылына 2,5 миллиард текше метр болатын газ өңдеу зауытын және Қарашығанақта жылына 5 миллиард текше метр газ өңдейтін өндіріс орнын іске қосу көзделіп отыр.

Энергетика министрінің мәліметінше, аталған жобалар газ өңдеу көлемін арттырып, тасымалдау жүйесін дамытуға және ел өңірлерін тұрақты газбен қамтамасыз етуге жол ашады.