Алматы облысында құны 32,5 млрд теңге болатын биофармацевтикалық зауыт бой көтереді. Осылайша отандық дәрі-дәрмек өндірісін дамыту көзделуде, – деп хабарлайды «Dalamedia» ақпараттық порталы.

Үкімет Денсаулық сақтау министрлігі мен «Steppe Pharmaceuticals» жауапкершілігі шектеулі серіктестігі арасында жасалған инвестициялық келісімді мақұлдады. Құжатқа сәйкес, жаңа өндіріс орны Алматы облысындағы «Алатау» арнайы экономикалық аймағында салынады. Тиісті қаулыға Премьер-министр Олжас Бектенов қол қойды. Жобаға тартылатын жеке инвестиция көлемі 32,5 млрд теңгені құрайды. Зауыт заманауи өндірісті дамытуға және дәрі-дәрмек шығаруды ел ішінде жолға қоюға мүмкіндік бермек.

Кәсіпорында дәрілік препараттың 20 түрі өндіріледі деп жоспарланып отыр. Олардың қатарында қатерлі ісік пен сирек кездесетін ауруларды емдеуге арналған дәрілер, сондай-ақ иммунобиологиялық препараттар бар.

Жоспарға сәйкес зауыт 2031 жылы іске қосылады. Ал 2032 жылы толық өндірістік қуатына шығып, 2034 жылға қарай негізгі бағыттар бойынша тұтас өндіріс кезеңіне көшеді.

Мұнда дәрі өндірумен қатар ғылыми-зерттеу жұмыстары да жүргізіледі. Атап айтқанда, биоэквиваленттілік зерттеулері қолға алынып, тіркеу құжаттары әзірленеді және халықаралық GMP талаптары енгізіледі. Кешен жанынан отандық мамандарды оқыту мен олардың біліктілігін жетілдіруге арналған жүйе де құрылмақ.

Жаңа өндіріс Алматы облысында фармацевтика саласының дамуына серпін береді деп күтілуде. Зауыт іске қосылған соң шамамен 60 адам тұрақты жұмыспен қамтылады.

Қазір елімізде фармацевтика саласында сегіз ірі инвестициялық жоба жүзеге асып жатыр. Өткен жылдың қорытындысында отандық фармацевтикалық өнім өндірісінің көлемі 191,1 млрд теңгеге жетіп, бір жыл ішінде 8,7 пайызға өскен. Ал салаға салынған инвестиция көлемі 390 млрд теңгеден асқан.

Алматы облысында салынатын жаңа кешен сырттан келетін дәріге тәуелділікті азайтып, халықты сапалы әрі өмірлік маңызы бар дәрі-дәрмекпен қамтуға жол ашады.