Қырғызстанда бұрынғы Ұлттық қауіпсіздік мемлекеттік комитетінің төрағасы Камчыбек Ташиев, экс-спикер Нұрланбек Тұрғынбек уулу және бұрынғы депутат Курманкул Зулушев билікті күшпен басып алуға әрекеттенді деген айыппен кінәлі деп танылды, — деп хабарлайды «Dalamedia» ақпараттық порталы.

Іс бойынша үкім Бішкектің Бірінші май аудандық сотында 2 шілдеге қараған түні жарияланды. Сот шешіміне сәйкес, үш саясаткер және тағы бес айыпталушы 4 жылға бас бостандығынан айырылған. Алайда оларға 3 жылдық пробация тағайындалып, осы мерзім ішінде заң бұзбаған жағдайда түрмеге қамалмайтыны айтылды. Егер пробация талаптары бұзылса, жаза нақты бас бостандығынан айыруға ауыстырылуы мүмкін.

Сот сонымен қатар барлық сегіз айыпталушының мүлкін тәркілеу туралы шешім шығарды. Ал «қызметтік өкілеттігін асыра пайдалану» бабы бойынша олар толық ақталған. Үкімнен кейін қамауда болған бес адам сот залынан босатылды.

Айта кетейік, прокурор тарап бұған дейін айыпталушыларға 9 жыл түрме жазасын сұраған болатын. Алайда сот әлдеқайда жеңіл жаза тағайындады.

Камчыбек Ташиевтің адвокаты Икрамидин Айтқұлов айыптаумен келіспейтінін айтып, кінәні дәлелдейтін нақты айғақтар ұсынылмағанын жеткізді. Ал Нұрланбек Тұрғынбек уулу тағылған айыптарды «ақылға қонымсыз» деп бағалаған.

57 жастағы Ташиев ұзақ жылдар бойы президент Садыр Жапаровтың жақын серігі саналып келген. Ол 2020 жылдан бастап ҰҚМК-ны басқарған және үкімет басшысының орынбасары қызметін де атқарған. Биыл ақпанда ол мемлекеттік қызметтерінен босатылған.

Іс қозғалуына президент сайлауын мерзімінен бұрын өткізуге шақырған 75 адамның үндеуі себеп болғаны айтылады. Бұл хатқа саясаткерлер мен бұрынғы шенеуніктер қол қойған. Кейін олардың бір бөлігіне де билікті күшпен басып алуға әрекеттенді деген айып тағылған.

Іс жабық режимде қаралып, сот процесі шамамен бір жарым айда аяқталды. Қырғызстан Конституциялық сотының түсіндіруінше, келесі президент сайлауы 2027 жылдың қаңтарына жоспарланған. Сол кезде қазіргі президент Садыр Жапаровтың алғашқы мерзімі аяқталады.

Осылайша, Қырғызстандағы жоғары лауазымды бұрынғы шенеуніктерге қатысты іс ел ішіндегі саяси ахуалға қатысты жаңа пікірталас тудырып отыр.