Қазақстан Үкіметі Ұлттық банк және Қаржы нарығын реттеу және дамыту агенттігімен бірлесіп, 2026–2028 жылдарға арналған макроэкономикалық тұрақтандыру және халықтың әл-ауқатын арттыру бағдарламасын жүзеге асыруды жоспарлап отыр, — деп хабарлайды «Dalamedia» ақпараттық порталы.

Бұл туралы Үкімет отырысында Премьер-министрдің орынбасары – Ұлттық экономика министрі Серік Жұмағарин мәлімдеді. Оның айтуынша, халықтың нақты табысын көбейту Үкіметтің негізгі басым бағыттарының бірі болып белгіленген.

Жаңа бағдарлама аясында еңбекақыны арттыру, тұрақты жұмыс орындарын ашу, азаматтардың қарыз жүктемесін азайту және кәсіпкерлікті қолдау бойынша бірқатар шара қабылданады.

Сондай-ақ ең төменгі жалақы көлемін, азаматтық қызметшілердің еңбекақысын және жалдамалы жұмысшылардың табысын арттыру мәселесі қарастырылмақ.

Үкімет халықтың шамадан тыс несие алуына да ерекше назар аударуды жоспарлап отыр. Тұтынушылық несиелердің өсуі азаматтардың қаржылық жағдайына әсер ететін факторлардың бірі ретінде бағаланып, бұл бағытта бақылауды күшейту көзделген.

Серік Жұмағариннің айтуынша, басты міндеттердің бірі — халықтың нақты табысын жыл сайын тұрақты түрде арттыру. Сонымен бірге жалақы өсімінің несие төлеуге ғана жұмсалып кетпеуі үшін инфляцияны тежеу жұмыстары жалғасады.

Министр Қазақстан экономикасы күрделі сыртқы жағдайларға қарамастан өсім көрсетіп отырғанын атап өтті. Оның сөзінше, кейінгі кезеңде ел экономикасы тұрақты қарқынмен дамып келеді.

Қаңтар–мамыр айларының қорытындысы бойынша экономикалық өсім 3,7 пайызды құрады. Мұнай өндірісін есептемегендегі көрсеткіш 5 пайыздан асқан. Бұл шикізаттық емес салалардың үлесі артып келе жатқанын көрсетеді.

Өңдеу өнеркәсібі, машина жасау, құрылыс материалдарын өндіру, фармацевтика, химия, азық-түлік өндірісі, құрылыс және көлік салаларында оң көрсеткіштер сақталған. Сонымен қатар сауда, ауыл шаруашылығы, ақпарат және байланыс бағыттарында да өсім байқалады.