«Bank RBK» АҚ Директорлар кеңесінің 11 маусымдағы шешімімен Айдос Мұхамеджанов 12 маусымнан бастап Басқарма төрағасының орынбасары – басқарма мүшесі қызметіне сайланды,-деп хабарлайды «Dalamedia» ақпараттық порталы.

Оған дейін аталған қызметке тағайындауға Қазақстан Республикасының Қаржы нарығын реттеу және дамыту агенттігі келісім берген. Бұған дейін Айдос Мұхамеджанов банк құрылымында басқарушы директор лауазымын атқарып келген.

Жаңа міндет аясында ол банктің IT бағытына, сондай-ақ шағын және орта бизнес пен бөлшек несие сегменттеріндегі стратегиялық және кредиттік тәуекелдерге жауап беретін бөлімшелердің жұмысын үйлестіреді. Сонымен бірге кредиттік әкімшілер қызметіне де жетекшілік етеді.

Bank RBK басшылығы оның көпжылдық тәжірибесі мен кәсіби білігі банк жұмысының тиімділігін арттырып, даму стратегиясын жүзеге асыруға серпін береді деген сенім білдірді. Басқарма төрайымы Наталья Акентьева бұл тағайындауды маманның кәсіби өсуіндегі заңды қадам деп бағалап, жаңа міндеттерде табыс тіледі.

Айдос Мұхамеджанов әл-Фараби атындағы Қазақ ұлттық университетін «қолданбалы математика» мамандығы бойынша тәмамдап, кейін қаржы және несие саласында білімін жетілдірген. Сондай-ақ University of Strathclyde оқу орнында MBA дәрежесін алған. Оның қаржы секторындағы еңбек өтілі 20 жылдан асады.

Бүгінде Bank RBK еліміздің бірқатар ірі қалаларында қызмет көрсетеді. Банк активтер мен несие портфелі көлемі бойынша еліміздегі жетекші қаржы институттарының қатарында. Соңғы деректерге сәйкес, банктің биылғы алғашқы бес айдағы таза пайдасы 22,8 млрд теңгеге жеткен.